మహిళా సాధికారతకు చిరస్మరణీయ చిహ్నం-సావిత్రీబాయి ఫూలే జీవితం!!

భారత మహిళా విద్యకు పునాది వేసిన మహానీయురాలు సావిత్రీబాయి ఫూలే జీవితం ఒక సాధారణ గృహిణి నుంచి సామాజిక విప్లవకారిణిగా ఎదిగిన స్ఫూర్తిదాయక ప్రయాణం. 1831లో మహారాష్ట్రలోని నైగావ్‌లో జన్మించిన ఆమె చిన్న వయసులోనే జ్యోతిరావ్ ఫూలే తో వివాహం జరిగింది. ఆ కాలంలో అమ్మాయిలకు చదువు అనేది దాదాపు నిషేధమే. కానీ జ్యోతీరావ్ ప్రోత్సాహంతో సావిత్రీబాయి అక్షరాస్యత సాధించి, చదువును ఆయుధంగా మలిచారు.

చదువు – విముక్తికి మార్గం”

సావిత్రీబాయి నమ్మకం ఒక్కటే .. “చదువే బానిసత్వానికి ముగింపు.”
1848లో పూణేలోని భీడేవాడలో బాలికల కోసం మొదటి పాఠశాలను ప్రారంభించడం ఆ కాలానికి విప్లవాత్మకం. సమాజం నుంచి తీవ్ర వ్యతిరేకత వచ్చినా, అవమానాలు ఎదురైనా, ఆమె వెనకడుగు వేయలేదు. పాఠశాలకు వెళ్తున్నప్పుడు కొందరు ఆమెపై బురద, రాళ్లు విసిరేవారు. అందుకే ఆమె ఎప్పుడూ అదనపు చీర తీసుకెళ్లి, పాఠశాలకు చేరుకున్నాక మార్చుకుని బోధించేవారని చెబుతారు. ఇది ఆమె అచంచల సంకల్పానికి ప్రతీక.

అణగారిన వర్గాల కోసం పోరాటం

సావిత్రీబాయి కేవలం మహిళల విద్యకే పరిమితం కాలేదు.

దళితులు, అణగారిన వర్గాల పిల్లల కోసం పాఠశాలలు ప్రారంభించారు.

అంటరానితనాన్ని వ్యతిరేకిస్తూ అందరికీ నీళ్లు అందుబాటులో ఉండేలా ఉమ్మడి బావిని ఏర్పాటు చేశారు.

వితంతువుల కోసం ఆశ్రయం కల్పించి, వారి పునర్వివాహానికి మద్దతు ఇచ్చారు.

ఆమె ప్రతి అడుగు సమానత్వం వైపు.

సాహిత్యంలో స్ఫూర్తి

సావిత్రీబాయి కవయిత్రిగా కూడా పేరు గడించారు. ఆమె రచనల్లో విద్య, ఆత్మగౌరవం, మహిళా స్వేచ్ఛ వంటి అంశాలు ప్రధానంగా కనిపిస్తాయి. ఆమె పదాలు ప్రజల్లో చైతన్యాన్ని రగిలించాయి.

సేవలోనే జీవితాంతం

1897లో ప్లేగు వ్యాధి విజృంభించినప్పుడు రోగులకు సేవలు అందిస్తూ, ఆమె కూడా ఆ వ్యాధి బారినపడి మార్చి 10న కన్నుమూశారు. చివరి శ్వాస వరకు సేవకే అంకితమై జీవించిన మహనీయురాలు ఆమె.