ధారావి స్లమ్ టూర్‌కు భారీ వసూళ్లు.. విదేశీయుల నుంచి రూ.15 వేలు

ముంబయిలోని ఆసియాలోనే అతిపెద్ద మురికివాడగా పేరుగాంచిన ధారావి ప్రస్తుతం ‘స్లమ్ టూరిజం’తో మళ్లీ వార్తల్లో నిలిచింది. విదేశీ పర్యాటకులు ధారావిని ప్రత్యక్షంగా చూడాలనే ఆసక్తి చూపుతుండటంతో అక్కడి కొందరు వ్యక్తులు దీనిని ఆదాయ మార్గంగా మార్చుకున్నారు.

జాతీయ మీడియా కథనాల ప్రకారం, విదేశీ పర్యాటకుల నుంచి ఒక్కో వ్యక్తికి అత్యధికంగా రూ.15,000 వరకు వసూలు చేస్తున్నట్లు సమాచారం. దేశంలోని ఇతర రాష్ట్రాల నుంచి వచ్చే పర్యాటకుల నుంచి సుమారు రూ.1,500 చొప్పున తీసుకుంటున్నట్లు వెల్లడించింది. పర్యటనలో భాగంగా మురికివాడ జీవన విధానం, చిన్న స్థాయి పరిశ్రమలు, లెదర్ మార్కెట్, చిన్న వ్యాపారాల గురించి వివరించేందుకు గైడ్లను ఏర్పాటు చేస్తున్నట్లు తెలిపింది.

గతంలో ఈ పర్యటనలను శిక్షణ పొందిన గైడ్లు నిర్వహించేవారని, ప్రస్తుతం ధారావిలోని యువకులే గైడ్లుగా మారారని స్థానికులు చెబుతున్నారు. స్థానికుడు ఓంకార్ ధమాలే మాట్లాడుతూ, రోజూ దేశం నలుమూలల నుంచి, విదేశాల నుంచి సందర్శకులు వస్తున్నారని చెప్పారు. ముఖ్యంగా ధారావిలోని లెదర్ మార్కెట్ వీధిని చూడటానికి ఎక్కువగా ఆసక్తి చూపుతారని తెలిపారు.

ఇంగ్లిష్‌ మాట్లాడగలిగే యువకులు విదేశీయులకు గైడ్లుగా వ్యవహరిస్తూ పర్యటన నిర్వహిస్తున్నారని పేర్కొన్నారు. ఒక్కో విదేశీయుడి నుంచి రూ.15,000 వరకు వసూలు చేస్తే, రోజుకు ఐదుగురికి పర్యటన నిర్వహించినా సుమారు రూ.75,000 వరకు ఆదాయం పొందుతున్నట్లు వెల్లడించారు.

ధారావిలో మురికివాడల పర్యాటకం ప్రస్తుతం అక్కడి ప్రజలకు ఒక విధమైన కుటీర పరిశ్రమగా మారిందని జాతీయ మీడియా కథనాలు పేర్కొన్నాయి. అయితే, పేదరికాన్ని పర్యాటక ఉత్పత్తిగా మార్చడం నైతికంగా సరైందా అనే చర్చ కూడా సామాజిక వర్గాల్లో ప్రారంభమైంది. మొత్తానికి ధారావి స్లమ్ టూరిజం ఇప్పుడు స్థానికులకు ఉపాధి కల్పించే మార్గంగా మారినప్పటికీ, దీనిపై విభిన్న అభిప్రాయాలు వ్యక్తమవుతున్నాయి.