గల్ఫ్‌లో యుద్ధ మేఘాలు.. అమెరికా స్థావరాలపై ఇరాన్ దాడులు

గల్ఫ్ ప్రాంతంలో పరిస్థితులు రోజురోజుకూ ఉద్రిక్తంగా మారుతున్నాయి. అమెరికా సైనిక స్థావరాలు, రాయబార కార్యాలయాలను లక్ష్యంగా చేసుకుని ఇరాన్ క్షిపణులు, డ్రోన్లతో దాడులు జరిపినట్లు పలు అంతర్జాతీయ మీడియా సంస్థలు వెల్లడిస్తున్నాయి. ఈ పరిణామాలు మధ్యప్రాచ్యంలో ఉద్రిక్తతలను మరింత పెంచాయి.

సౌదీ అరేబియాలోని ప్రిన్స్ సుల్తాన్ ఎయిర్ బేస్ పై జరిగిన దాడిలో అమెరికాకు చెందిన కొన్ని రీఫ్యూయెలింగ్ విమానాలు దెబ్బతిన్నాయని సమాచారం. ఈ స్థావరం అమెరికా సైన్యానికి కీలకమైన వైమానిక కేంద్రంగా పరిగణించబడుతుంది. దాడి తర్వాత అక్కడ భద్రతను మరింత కట్టుదిట్టం చేసినట్లు తెలుస్తోంది. ఇరాక్ రాజధాని బాగ్దాద్‌లో ఉన్న అమెరికా రాయబార కార్యాలయంపై కూడా క్షిపణి దాడి జరిగింది. ఎంబసీ ప్రాంగణంలోని హెలిప్యాడ్‌పై ఒక క్షిపణి పడినట్లు ఇరాక్ అధికారులు వెల్లడించారు. ఈ ఘటనతో అక్కడ భద్రతా దళాలు అత్యంత అప్రమత్తంగా మారాయి.

మరోవైపు సౌదీ అరేబియా తూర్పు ప్రాంతం వైపు దూసుకొచ్చిన ఆరు డ్రోన్లను తమ వైమానిక రక్షణ వ్యవస్థ అడ్డుకుందని సౌదీ అధికారులు తెలిపారు. దుబాయ్ ప్రభుత్వం కూడా ఇరాన్ వైమానిక దాడిని సమర్థంగా అడ్డుకున్నామని పేర్కొంది. అదే సమయంలో ఖతార్ రక్షణ శాఖ తమ దేశంపై దూసుకొచ్చిన ఇరాన్ మిస్సైళ్లను అడ్డుకున్నామని ప్రకటించింది. ఖతార్ రాజధాని దోహాలో పలుచోట్ల పేలుళ్ల శబ్దాలు వినిపించాయని అక్కడి ప్రజలు తెలిపారు. ఈ ఘటనలతో గల్ఫ్ ప్రాంతం మొత్తం అలర్ట్‌లోకి వెళ్లింది.

ఈ నేపథ్యంలో ఒమన్‌లోని అమెరికా ఎంబసీ అత్యవసర సూచనలు జారీ చేసింది. అవసరం లేని సిబ్బంది వెంటనే తిరిగి రావాలని, అలాగే దౌత్య సిబ్బంది కుటుంబ సభ్యులు కూడా ఒమన్‌ను వెంటనే విడిచిపెట్టాలని అమెరికా సూచించింది. ఇదే సమయంలో ఉత్తర ఇజ్రాయెల్‌లోని గలిలీ ప్రాంతంపై రాకెట్లు, క్షిపణులతో దాడులు జరిగినట్లు సమాచారం. ఈ పరిణామాలన్నింటితో మధ్యప్రాచ్యంలో యుద్ధ వాతావరణం నెలకొనడంతో ప్రపంచ దేశాలు పరిస్థితిని అత్యంత జాగ్రత్తగా గమనిస్తున్నాయి.