తోమహాక్ క్షిపణుల అధిక వినియోగం… అమెరికాలో పెరుగుతున్న ఆందోళన

ఇరాన్‌పై యుద్ధ పరిస్థితుల నేపథ్యంలో అమెరికా భారీగా ‘తోమహాక్ క్రూజ్ క్షిపణులను’ వినియోగించడం రక్షణ వర్గాల్లో ఆందోళనకు దారితీస్తోంది. ఇప్పటివరకు సుమారు 850 క్షిపణులను ప్రయోగించగా… ఇది అమెరికా ఏడాదికి కొనుగోలు చేసే సంఖ్య కంటే దాదాపు తొమ్మిది రెట్లు ఎక్కువగా ఉండటం గమనార్హం. సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్ గణాంకాల ప్రకారం… అమెరికా సాధారణంగా ఏడాదికి సుమారు 90 తోమహాక్ క్షిపణులను మాత్రమే కొనుగోలు చేస్తుంది. అయితే ప్రస్తుత యుద్ధ పరిస్థితుల్లో వినియోగం అధికమవడంతో నిల్వలు తగ్గిపోతున్నాయనే ఆందోళన వ్యక్తమవుతోంది.

అయితే ట్రంప్ యంత్రాంగం మాత్రం ఈ వార్తలను ఖండిస్తోంది. యుద్ధ అవసరాలకు సరిపడా ఆయుధ సంపత్తి తమ వద్ద ఉందని, ఉత్పత్తి ప్రక్రియను వేగవంతం చేస్తున్నామని వైట్‌హౌస్ వర్గాలు చెబుతున్నాయి. తోమహాక్ క్షిపణులు అత్యంత కచ్చితత్వంతో 1000 మైళ్లకు పైగా దూరంలోని లక్ష్యాలను ఛేదించగలవు. వీటిని ప్రధానంగా నౌకలు, జలాంతర్గాముల నుంచి ప్రయోగిస్తారు. గగనతల రక్షణ వ్యవస్థలను దాటుకుని లక్ష్యాన్ని చేరే సామర్థ్యం వీటి ప్రత్యేకత.

ధర పరంగా చూస్తే… ఒక్కో క్షిపణి సుమారు 2.2 మిలియన్ డాలర్ల నుంచి 6 మిలియన్ డాలర్ల వరకు ఉంటుంది. అంటే భారత కరెన్సీలో కోట్ల రూపాయలు ఖర్చవుతాయి. తయారీ ప్రక్రియ కూడా సంక్లిష్టంగా ఉండటంతో కొత్త క్షిపణులను వేగంగా సమకూర్చడం సవాల్‌గా మారింది.

అమెరికా వద్ద ప్రస్తుతం సుమారు 3,100 తోమహాక్ క్షిపణులు ఉన్నట్లు అంచనా. అయితే వినియోగం పెరుగుతున్న వేగం… ఉత్పత్తి వేగంతో పోలిస్తే ఎక్కువగా ఉండటం వల్ల భవిష్యత్తులో సరఫరా సమస్యలు తలెత్తే అవకాశం ఉందని నిపుణులు హెచ్చరిస్తున్నారు. మొత్తంగా ఈ పరిణామం ఆధునిక యుద్ధాల్లో ఆయుధ వినియోగం ఎంత భారీ స్థాయిలో ఉంటుందో… అలాగే ఆయుధ నిల్వల ప్రాముఖ్యత ఎంత ముఖ్యమో మరోసారి స్పష్టం చేస్తోంది.