అరెరే..బూమ్ బూమ్ బుమ్రాకు ఏమైంది? 19 ఓవర్లు.. 163 పరుగులు..సున్నా వికేట్లా!

ప్రపంచ క్రికెట్‌లో అత్యుత్తమ బౌలర్‌గా పేరొందిన జస్‌ప్రీత్ బుమ్రా.. ప్రస్తుత ఐపీఎల్ సీజన్‌లో తన మార్క్ చూపించలేక తడబడుతున్నాడు. బ్యాటర్ల గుండెల్లో రైళ్లు పరిగెత్తించే ఆ యార్కర్లు, ఖతర్నాక్ బౌన్సర్లు ఈసారి వికెట్లను వేటాడలేకపోతున్నాయి. ఐపీఎల్‌లో ముంబయి ఇండియన్స్ వెన్నెముకగా నిలిచే బుమ్రా, వరుసగా 5 ఇన్నింగ్స్‌లుగా ఒక్క వికెట్ కూడా తీయలేకపోవడం అభిమానులను విస్మయానికి గురిచేస్తోంది.

బుమ్రా గణంకాలు పరిశీలిస్తే పరిస్థితి ఎంత తీవ్రంగా ఉందో అర్థమవుతుంది:

వికెట్ల కరువు: గత 5 ఇన్నింగ్స్‌ల్లో (గత సీజన్ చివరి మ్యాచ్‌తో కలిపి) బుమ్రా మొత్తం 19 ఓవర్లు వేసి 163 పరుగులు సమర్పించుకున్నాడు, కానీ ఒక్క వికెట్ కూడా ఖాతాలో చేరలేదు.

ధారాళంగా పరుగులు: ముంబయి ఆడిన గత నాలుగు మ్యాచుల్లో బుమ్రా ఎకానమీ కూడా ఆందోళన కలిగిస్తోంది. ఢిల్లీపై 21, కోల్‌కతాపై 35, రాజస్థాన్‌పై 32, బెంగళూరుపై 35 పరుగులు ఇచ్చుకున్నాడు.

టీనేజ్ బాదుడు: రాజస్థాన్ రాయల్స్‌తో జరిగిన మ్యాచ్‌లో యువ సంచలనం వైభవ్ సూర్యవంశీ.. బుమ్రా బౌలింగ్‌లోనే రెండు సిక్సర్లు బాదడం బుమ్రా ప్రస్తుత ఫామ్‌కు అద్దం పడుతోంది.

ఆర్సీబీ విధ్వంసం: ఆదివారం రాయల్ ఛాలెంజర్స్ బెంగళూరుతో జరిగిన మ్యాచ్‌లోనూ బుమ్రా తన మ్యాజిక్ చూపించలేకపోయాడు. సాల్ట్, పాటీదార్ మెరుపులతో ఆర్సీబీ ఏకంగా 240 పరుగుల భారీ స్కోరు సాధించింది.

విశ్లేషకుల అభిప్రాయం: బుమ్రా తన ప్రధాన అస్త్రమైన యార్కర్లను సరిగ్గా సంధించలేకపోతున్నాడని క్రికెట్ నిపుణులు అంటున్నారు. వికెట్ల కోసం ప్రయత్నిస్తూ ఒత్తిడికి లోనై పరుగులు ఇస్తున్నాడని, వికెట్ల కంటే డాట్ బాల్స్ వేయడంపై దృష్టి పెడితే లయ దొరుకుతుందని సూచిస్తున్నారు. బుమ్రా వికెట్లు తీయలేకపోవడం ముంబయి విజయ అవకాశాలను తీవ్రంగా దెబ్బతీస్తోందని సీనియర్ స్పిన్నర్ అశ్విన్ సైతం అభిప్రాయపడ్డారు.