ఉప్పల్‌లో పరుగుల సునామీ..హెడ్-అభిషేక్ వర్సెస్ జైశ్వాల్-వైభవ్! ఎవరు తోపు?

ఉప్పల్ స్టేడియం వేదికగా సోమవారం రాత్రి ఒక హై-వోల్టేజ్ ‘లెఫ్ట్ హ్యాండ్’ బ్యాటింగ్‌ వార్‌కు తెరలేవబోతోంది. సన్‌రైజర్స్ హైదరాబాద్ (SRH), రాజస్థాన్ రాయల్స్ (RR) జట్లు తలపడుతున్న ఈ మ్యాచ్‌లో అందరి కళ్లూ ఇరుజట్ల ఓపెనింగ్ జోడీలపైనే ఉన్నాయి. ఒకవైపు ‘హెడ్-అభిషేక్’, మరోవైపు ‘జైశ్వాల్-వైభవ్’.. ఈ ఆరంభ వీరుల్లో ఎవరు పైచేయి సాధిస్తారన్నదే ఇప్పుడు హాట్ టాపిక్.

విధ్వంసకర ఓపెనర్ల సమరం

ఈ సీజన్‌లో 300 పరుగుల మార్కును అందుకోగల సత్తా ఉన్న జట్లు ఇవేనని విశ్లేషకులు భావిస్తున్నారు. పవర్‌ ప్లేలోనే 100 పరుగులు సాధించగల ఇరుజట్ల ఓపెనింగ్ జోడీలే దీనికి కారణం.

సన్‌రైజర్స్ జోడీ: ట్రావిస్ హెడ్, అభిషేక్ శర్మ తమదైన రోజున బౌలర్లకు చుక్కలు చూపిస్తున్నారు.

రాజస్థాన్ జోడీ: యశస్వి జైశ్వాల్‌తో పాటు 15 ఏళ్ల టీనేజ్ సంచలనం వైభవ్ సూర్యవంశీ భీకరమైన ఫామ్‌లో ఉన్నాడు. కేవలం 15 బంతుల్లోనే రెండు అర్ధసెంచరీలు సాధించి, 266.66 స్ట్రైక్ రేట్‌తో దూసుకుపోతున్న వైభవ్‌ను అడ్డుకోవడం ఎస్‌ఆర్‌హెచ్‌ బౌలర్లకు పెద్ద సవాల్.

ఎస్‌ఆర్‌హెచ్‌ కష్టాలు – రాజస్థాన్ దూకుడు

సన్‌రైజర్స్: ఇషాన్ కిషన్ సారథ్యంలోని హైదరాబాద్ జట్టు ఆశించిన స్థాయిలో రాణించలేకపోతోంది. రెగ్యులర్ కెప్టెన్ ప్యాట్ కమిన్స్ సేవలు అందుబాటులో లేకపోవడం పెద్ద లోటుగా మారింది. బ్యాటింగ్ బాగానే ఉన్నా, జైదేవ్ ఉనద్కత్, హర్షల్‌ పటేల్‌ వంటి బౌలర్లు పరుగులు ధారాళంగా ఇస్తుండటం ఆందోళన కలిగిస్తోంది.

రాజస్థాన్: రియాన్ పరాగ్ కెప్టెన్సీలో రాజస్థాన్ అజేయంగా దూసుకుపోతోంది. ఆడిన 4 మ్యాచ్‌ల్లోనూ గెలిచి పాయింట్ల పట్టికలో అగ్రస్థానంలో ఉంది. జోఫ్రా ఆర్చర్ నేతృత్వంలోని బౌలింగ్ విభాగం చాలా పటిష్టంగా కనిపిస్తోంది.

కీలక పోరు ఎక్కడ?

ఉప్పల్ పిచ్ బ్యాటింగ్‌కు అనుకూలించే అవకాశం ఉండటంతో, పవర్ ప్లేలో ఏ జట్టు ఎక్కువ వికెట్లు కాపాడుకుని స్కోరు బోర్డును పరుగులు పెట్టిస్తుందో వారిదే విజయం. బౌలింగ్‌లోనూ రాజస్థాన్ పటిష్టంగా ఉండటం ఎస్‌ఆర్‌హెచ్‌పై ఒత్తిడి పెంచుతోంది.