ఇంటర్ తర్వాత నేరుగా పీజీ.. ఇంటిగ్రేటెడ్ కోర్సులకు పెరుగుతున్న ఆదరణ

ఇంటర్మీడియట్ తర్వాత నేరుగా యూజీతో పాటు పీజీ చదివే అవకాశాన్ని దేశంలోని పలు ప్రముఖ విద్యాసంస్థలు కల్పిస్తున్నాయి. ఐఐటీలు, కేంద్రీయ విశ్వవిద్యాలయాలు, డీమ్డ్ యూనివర్సిటీలు, ప్రత్యేక విద్యాసంస్థలు ఇంటిగ్రేటెడ్ విధానంలో బీటెక్ + ఎంటెక్, బీఎస్సీ + ఎమ్మెస్సీ, బీఏ + ఎంఏ, బీసీఏ + ఎంసీఏ, బీబీఎం + ఎంబీఏ వంటి కోర్సులను అందిస్తున్నాయి. ఈ విధానంలో చదివే విద్యార్థులు అదనపు ప్రవేశ పరీక్షలు లేకుండానే ఒకే సంస్థలో యూజీ నుంచి పీజీ వరకు చదువు కొనసాగించవచ్చు.

ఇంటిగ్రేటెడ్ కోర్సుల ప్రధాన ప్రయోజనం సమయం ఆదా కావడం. సాధారణంగా యూజీ పూర్తయ్యాక పీజీకి మరో రెండు సంవత్సరాలు పడుతుండగా, ఇంటిగ్రేటెడ్ కోర్సుల ద్వారా ఏడాది వరకు సమయం ఆదా అవుతుంది. అంతేకాకుండా ఒకే సబ్జెక్టుపై లోతైన అవగాహన, పరిశోధన స్థాయి జ్ఞానం పొందే అవకాశం ఉంటుంది. విద్యార్థులు మధ్యలో ఆసక్తి లేకపోతే యూజీ డిగ్రీతో బయటకు వచ్చే వెసులుబాటును కూడా కొన్ని సంస్థలు కల్పిస్తున్నాయి.

ఐఐటీలు ఇంటిగ్రేటెడ్ ఎంటెక్, ఎమ్మెస్సీ కోర్సులను జేఈఈ అడ్వాన్స్‌డ్ స్కోర్ల ఆధారంగా అందిస్తున్నాయి. ఐఐఎస్‌ఈఆర్‌లు బీఎస్-ఎంఎస్ కోర్సులతో పాటు ప్రతి నెలా స్టైపెండ్ కూడా ఇస్తున్నాయి. నైసర్ వంటి సంస్థల్లో నెస్ట్ పరీక్ష ద్వారా ప్రవేశం పొందవచ్చు. హైదరాబాద్ కేంద్రీయ విశ్వవిద్యాలయం, పాండిచ్చేరి యూనివర్సిటీ, జేఎన్‌యూ, బీహెచ్‌యూ వంటి ప్రముఖ సంస్థలు కూడా పలు ఇంటిగ్రేటెడ్ పీజీ కోర్సులను అందిస్తున్నాయి.

తెలుగు రాష్ట్రాల్లో ఉస్మానియా, కాకతీయ, పాలమూరు, తెలంగాణ, మహాత్మా గాంధీ, ఆచార్య నాగార్జున, యోగి వేమన విశ్వవిద్యాలయాలు పలు ఇంటిగ్రేటెడ్ కోర్సులను నిర్వహిస్తున్నాయి. కేంద్రీయ విశ్వవిద్యాలయాల్లో ప్రవేశాలకు సీయూఈటీ యూజీ పరీక్ష ఉపయోగపడుతుండగా, రాష్ట్ర స్థాయి యూనివర్సిటీల్లో ఆయా ఉమ్మడి ప్రవేశ పరీక్షల ద్వారా అడ్మిషన్లు కల్పిస్తున్నారు.