టీ20 జట్టుకు కొత్త కెప్టెన్? మరో రెండు రోజుల్లో కీలక నిర్ణయం తీసుకోనున్న బీసీసీఐ

టీమ్‌ఇండియా టీ20 జట్టుకు సంబంధించి మరో రెండు రోజుల్లో కీలక ప్రకటన వెలువడనుంది. ఐర్లాండ్‌, ఇంగ్లాండ్‌తో జరగనున్న టీ20 సిరీస్‌లతో పాటు ఆసియా గేమ్స్‌ కోసం భారత జట్టును బీసీసీఐ సెలక్షన్ కమిటీ ప్రకటించనుంది. ఈ ప్రకటనలో ప్రధాన ఆకర్షణగా టీ20 జట్టుకు కొత్త కెప్టెన్ ఎంపిక ఉండే అవకాశం ఉందని క్రికెట్ వర్గాల్లో చర్చ జరుగుతోంది.

ప్రస్తుతం టీ20 జట్టు కెప్టెన్‌గా ఉన్న సూర్యకుమార్ యాదవ్ జట్టును సమర్థంగా నడిపించినప్పటికీ, బ్యాటింగ్‌లో స్థిరమైన ప్రదర్శన ఇవ్వలేకపోతున్నాడని విశ్లేషణలు వినిపిస్తున్నాయి. దీంతో భవిష్యత్ ప్రణాళికల్లో భాగంగా కొత్త నాయకత్వాన్ని తీసుకురావాలని సెలక్టర్లు ఆలోచిస్తున్నట్లు సమాచారం.

2028 టీ20 ప్రపంచకప్‌తో పాటు ఒలింపిక్స్‌ను దృష్టిలో ఉంచుకుని జట్టును పునర్నిర్మించాలనే ఉద్దేశంతో బీసీసీఐ ముందుకు సాగుతోంది. ఈ నేపథ్యంలో కొత్త కెప్టెన్ రేసులో శ్రేయస్ అయ్యర్ పేరు ప్రధానంగా వినిపిస్తోంది. అలాగే తెలుగు ఆటగాడు తిలక్ వర్మ కూడా బలమైన పోటీదారుడిగా ఉన్నాడు. ఇషాన్ కిషన్, సంజు శాంసన్ పేర్లు కూడా పరిశీలనలో ఉన్నట్లు తెలుస్తోంది. అయితే ప్రధాన కోచ్ గౌతమ్ గంభీర్, సెలక్టర్ల మధ్య ఇంకా తుది ఏకాభిప్రాయం రాలేదని సమాచారం.

ఇప్పటికే ఆసియా గేమ్స్‌ కోసం ప్రాబబుల్ జాబితా ప్రకటించగా, అందులో సూర్యకుమార్ యాదవ్, శుభ్‌మన్ గిల్‌లకు చోటు దక్కలేదు. వర్క్‌లోడ్ మేనేజ్‌మెంట్‌ కారణంగా సీనియర్లను దూరంగా ఉంచినట్లు బీసీసీఐ స్పష్టం చేసింది. దీంతో ఆసియా గేమ్స్‌ జట్టు పూర్తిగా యువ ఆటగాళ్లతో ఉండే అవకాశం ఉంది.

ఇక ఇంగ్లాండ్‌తో జరగనున్న టీ20 సిరీస్‌కు మాత్రం పూర్తి స్థాయి బలమైన జట్టు వెళ్లనుంది. ఆసియా గేమ్స్‌ కోసం మాత్రమే కొత్త కెప్టెన్ ఎంపికనా లేదా అన్ని సిరీస్‌లకూ అదే కొనసాగుతుందా అన్నది త్వరలో స్పష్టత రానుంది.

మరోవైపు ఐపీఎల్‌లో మెరిసిన 15 ఏళ్ల వైభవ్ సూర్యవంశీకి జాతీయ జట్టులో అవకాశం దక్కే అవకాశాలు ఉన్నట్లు సమాచారం. అతని ఎంపికపై బీసీసీఐ సానుకూలంగా ఉన్నట్లు తెలుస్తోంది.

షెడ్యూల్ ప్రకారం ఐర్లాండ్‌తో రెండు టీ20లు, ఇంగ్లాండ్‌లో ఐదు టీ20లు, జింబాబ్వేతో మూడు టీ20లు, అలాగే జపాన్‌లో ఆసియా గేమ్స్‌ జరగనున్నాయి.