రాష్ట్రంలో బీటెక్ సీట్ల సంఖ్య ఈసారి కూడా కొంత పెరిగే అవకాశం ఉన్నట్లు విద్యాశాఖ వర్గాలు చెబుతున్నాయి. కొత్త కోర్సులు, ఇప్పటికే ఉన్న కోర్సుల్లో అదనపు సీట్ల కోసం పలు ఇంజినీరింగ్ కళాశాలలు అఖిల భారత సాంకేతిక విద్యామండలి (ఏఐసీటీఈ)కి దరఖాస్తు చేయడంతో ఈ పరిణామం చోటుచేసుకుంటోంది.
గత ఏడాది రాష్ట్రంలో కన్వీనర్ కోటా, యాజమాన్య కోటా సీట్లు కలిపి మొత్తం 1,25,345 సీట్లు ఉన్నాయి. ఈసారి అదనంగా దాదాపు 15 వేల సీట్లకు ఏఐసీటీఈ ఇప్పటికే అనుమతి ఇచ్చినట్లు సమాచారం. అయితే ఈ సీట్లకు రాష్ట్ర ప్రభుత్వం నుండి నిరభ్యంతర ధ్రువపత్రం (ఎన్వోసీ) రావాల్సి ఉంది. దీనిపై తుది నిర్ణయం ముఖ్యమంత్రి రేవంత్ రెడ్డి తీసుకోనున్నారు.
కళాశాలల యాజమాన్యాలు ఇప్పటికే ప్రజాప్రతినిధులను కలిసి అదనపు సీట్లకు అనుమతి ఇవ్వాలని విజ్ఞప్తి చేసినట్లు తెలుస్తోంది. మరోవైపు ప్రైవేట్, డీమ్డ్ యూనివర్సిటీలు పెద్ద సంఖ్యలో సీట్లు భర్తీ చేసుకుంటుండగా, తమ కళాశాలలకు మాత్రం సీట్ల పెంపు పరిమితంగా ఉండటంపై కొంతమంది యాజమాన్యాలు అసంతృప్తి వ్యక్తం చేస్తున్నాయి. ఫీజుల విషయంలో కూడా ఒత్తిడులు ఎదురవుతున్నాయని వారు చెబుతున్నారు.
ప్రభుత్వం మాత్రం ప్రస్తుతం కంప్యూటర్ సైన్స్, ఐటీ సంబంధిత బ్రాంచీల్లో సుమారు 70 శాతం సీట్లు ఉన్నాయని, ఈసారి కోర్ బ్రాంచీలకు డిమాండ్ పెరుగుతున్న నేపథ్యంలో మళ్లీ సాఫ్ట్వేర్ సంబంధిత సీట్లను పెంచాలా లేదా అన్న అంశంపై సమీక్షిస్తోంది. ఈ విషయంలో సాంకేతిక విద్యాశాఖ అన్ని కళాశాలల నుంచి వివరాలు సేకరిస్తోంది. ఏ కళాశాల ఎంత సీట్లు కోరుతోంది, అక్కడ మౌలిక వసతులు ఎలా ఉన్నాయి, ప్రవేశాల తీరు ఎలా ఉంది వంటి అంశాలపై సమగ్ర నివేదిక సిద్ధం చేసి ప్రభుత్వానికి సమర్పించనుంది.
ఇప్పటివరకు జేఎన్టీయూహెచ్, ఉస్మానియా విశ్వవిద్యాలయాల అనుబంధ ఇంజినీరింగ్ కళాశాలల తనిఖీలు గత ఏడాది నిబంధనల ప్రకారమే పూర్తయ్యాయి. కొత్త కోర్సులు లేదా అదనపు సీట్లు మంజూరు చేస్తే మళ్లీ తనిఖీలు నిర్వహించాల్సి ఉంటుంది. అధ్యాపకులు, ల్యాబ్ సదుపాయాలు, ఇతర ప్రమాణాలు పూర్తిగా ఉన్నప్పుడే కొత్త సీట్లకు అనుమతి ఇవ్వనున్నారు.
అదనపు సీట్లు మంజూరైనప్పటికీ అవి మొదటి విడత కౌన్సెలింగ్లో కాకుండా రెండో విడత కౌన్సెలింగ్లో మాత్రమే చేరే అవకాశం ఉందని అంచనా వేస్తున్నారు. ఈ నెల 19 నుంచి తొలివిడత కౌన్సెలింగ్ ప్రారంభమవుతుంది, 25 నుంచి వెబ్ ఆప్షన్లు నమోదు చేసుకోవచ్చు. గత ఏడాది రెండో విడత కౌన్సెలింగ్లో ప్రభుత్వం 7,650 సీట్లకు అనుమతి ఇచ్చిన విషయం తెలిసిందే.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsToday NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews WorldNews
