హైదరాబాద్‌లో నెస్లే కొత్త గ్లోబల్‌ కేపబిలిటీ సెంటర్‌ ఏర్పాటు

స్విట్జర్లాండ్‌కు చెందిన ప్రముఖ వినియోగ వస్తువుల సంస్థ Nestlé తన వ్యాపార సేవల విస్తరణలో భాగంగా హైదరాబాద్‌లో కొత్త గ్లోబల్‌ కేపబిలిటీ సెంటర్‌ (జీసీసీ)ను ఏర్పాటు చేయనుంది. Nestlé Business Solutions ఆధ్వర్యంలో ఈ కేంద్రాన్ని ఏర్పాటు చేయనుండగా, Genpact భాగస్వామ్యంతో కార్యకలాపాలు నిర్వహించనుంది.

నెస్లే బిజినెస్‌ సర్వీసెస్‌ ఇండియా ఈ కొత్త కేంద్రం ద్వారా సంస్థకు సంబంధించిన అంతర్జాతీయ వ్యాపార సేవలను మరింత సమర్థవంతంగా నిర్వహించనుంది. అయితే ఈ కేంద్రం ఏర్పాటుకు సంబంధించిన పెట్టుబడి వివరాలను కంపెనీ వెల్లడించలేదు.

ఈ జీసీసీ ద్వారా డేటా విశ్లేషణ, కృత్రిమ మేధ (ఏఐ), ఆటోమేషన్‌, డిజిటల్‌ పరిష్కారాలు వంటి అధునాతన సాంకేతిక సేవలకు ప్రాధాన్యం ఇవ్వనున్నారు. జెన్‌ప్యాక్ట్‌ అందించే ఇంటెలిజెన్స్‌, డేటా, ఏఐ, ఆటోమేషన్‌ సామర్థ్యాలను వినియోగించుకుని నెస్లే తన వ్యాపార ప్రక్రియలను మరింత సరళీకరించడంతో పాటు, ప్రామాణీకరించి ప్రపంచ స్థాయిలో విస్తరించేందుకు ఈ కేంద్రం ఉపయోగపడనుంది.

నెస్లే గ్రూప్‌కు భారత్‌లో పూర్తి స్థాయి అనుబంధ సంస్థగా నెస్లే బిజినెస్‌ సర్వీసెస్‌ ఇండియా కొనసాగుతోంది. భారత్‌లో పెరుగుతున్న సాంకేతిక నైపుణ్యం, డిజిటల్‌ సామర్థ్యాలను దృష్టిలో ఉంచుకుని హైదరాబాద్‌ను గ్లోబల్‌ ఆపరేషన్స్‌ కేంద్రంగా ఎంపిక చేసినట్లు తెలుస్తోంది.

హైదరాబాద్‌ ఇప్పటికే పలు అంతర్జాతీయ సంస్థలకు గ్లోబల్‌ కేపబిలిటీ సెంటర్లు, టెక్నాలజీ హబ్‌లకు ప్రధాన కేంద్రంగా మారింది. ఐటీ నైపుణ్యం, మౌలిక సదుపాయాలు, ప్రతిభావంతులైన మానవ వనరుల కారణంగా ప్రపంచ దిగ్గజ కంపెనీలు నగరంలో తమ కార్యకలాపాలను విస్తరిస్తున్నాయి.

నెస్లే కొత్త జీసీసీ ఏర్పాటు ద్వారా తెలంగాణలో టెక్నాలజీ, డేటా, డిజిటల్‌ సేవల రంగాల్లో మరిన్ని అవకాశాలు పెరిగే అవకాశం ఉందని పరిశ్రమ వర్గాలు భావిస్తున్నాయి. ఈ కేంద్రం నెస్లే గ్లోబల్‌ వ్యాపార కార్యకలాపాలకు కీలక మద్దతు కేంద్రంగా పనిచేయనుంది.