ముడి చమురు ధరలు అధిక స్థాయుల్లో కొనసాగుతున్న నేపథ్యంలో ఈ వారం దేశీయ స్టాక్ మార్కెట్లు పరిమిత శ్రేణిలోనే కదిలే అవకాశాలు ఉన్నాయని విశ్లేషకులు అంచనా వేస్తున్నారు. చమురు ధరల పెరుగుదలతో దిగుమతి వ్యయం, ద్రవ్యోల్బణ ఆందోళనలు పెరిగే అవకాశం ఉండటంతో రూపాయిపై కూడా ఒత్తిడి కొనసాగే వీలుంది. పశ్చిమాసియాలో ఉద్రిక్తతలు, ఇరాన్పై అమెరికా ఆంక్షల అంశం మార్కెట్ సెంటిమెంట్ను ప్రభావితం చేయొచ్చు.
అయితే నిఫ్టీ-50కు అంతర్లీనంగా సానుకూల సంకేతాలు ఉన్నాయని సాంకేతిక నిపుణులు చెబుతున్నారు. 24,100 పాయింట్ల వద్ద తక్షణ మద్దతు ఉండగా, కొనుగోళ్ల జోరు కొనసాగితే 24,500-24,600 స్థాయుల దిశగా సూచీ పయనించే అవకాశం ఉందని అంచనా. విదేశీ పోర్టుఫోలియో మదుపర్ల కొనుగోళ్లు కూడా మార్కెట్కు కొంత బలాన్ని అందిస్తున్నాయి. ఈ నెలలో ఇప్పటివరకు ఎఫ్పీఐలు రూ.23,544 కోట్ల విలువైన షేర్లను కొనుగోలు చేశారు. జులైలో వారి కొనుగోళ్లు రూ.20,200 కోట్లుగా నమోదయ్యాయి.
ఔషధ రంగంలో ప్రధాన షేర్లలో లాభాల స్వీకరణ కారణంగా సూచీ కొంతకాలం పరిమిత శ్రేణిలో కదిలే అవకాశం ఉంది. అమెరికా మార్కెట్లో కంపెనీల కార్యకలాపాలు క్రమంగా పుంజుకోవడం, కొత్త ఔషధాల ఆవిష్కరణలు భవిష్యత్ వృద్ధికి కీలకంగా మారొచ్చని బ్రోకరేజీలు భావిస్తున్నాయి.
ముడి చమురు ధరలు బ్యారెల్కు 100 డాలర్లకు చేరువ కావడంతో ఎఫ్ఎమ్సీజీ కంపెనీలపై ఒత్తిడి పెరగొచ్చు. చక్కెర ధరల పెరుగుదల కూడా ఈ రంగానికి ప్రతికూలంగా మారుతోంది. దీంతో ఎఫ్ఎమ్సీజీ సూచీ వరుసగా మూడో వారమూ నష్టాలను చవిచూసే అవకాశం ఉందని అంచనా.
చమురు-గ్యాస్ రంగ షేర్లు కొంతకాలంగా స్థిరీకరణ దశలోనే ఉన్నాయి. నిఫ్టీ ఆయిల్ అండ్ గ్యాస్ సూచీ 10,950-11,410 స్థాయుల మధ్య కదులుతోంది. దేశీయ పీఎన్జీ కనెక్షన్ల విస్తరణకు కేంద్రం తీసుకుంటున్న చర్యలు ఈ రంగంలోని కొన్ని కంపెనీలకు సానుకూలంగా మారొచ్చు.
ఐటీ రంగంలో లార్జ్క్యాప్ కంపెనీలతో పోలిస్తే మిడ్క్యాప్ షేర్లు మెరుగ్గా రాణించే అవకాశం ఉందని నిపుణులు చెబుతున్నారు. మధ్యస్థాయి ఐటీ సంస్థలకు ఏఐ ఆధారిత ప్రాజెక్టులు పెరుగుతుండటం ఇందుకు ప్రధాన కారణంగా కనిపిస్తోంది. అయితే స్వల్పకాలంలో ఐటీ సూచీ పరిమిత శ్రేణిలోనే ఉండొచ్చు.
టెలికాం రంగానికి స్వల్పకాలంలో సానుకూల వాతావరణం కనిపిస్తోంది. డిసెంబరు త్రైమాసికంలో టారిఫ్ల పెంపు ఉండొచ్చన్న అంచనాలు ఈ రంగానికి ఊతమిస్తున్నాయి. టెలికాం సూచీకి 3,550 వద్ద మద్దతు, 3,750 వద్ద నిరోధం కనిపిస్తోంది.
యంత్రపరికరాల కంపెనీల షేర్లు మాత్రం ఒత్తిడిని ఎదుర్కొనే అవకాశం ఉంది. ముడి చమురు ధరలు పెరగడం వల్ల ఉత్పత్తి వ్యయాలు, మార్జిన్లపై ప్రభావం పడొచ్చు. జూన్ త్రైమాసికంలోనూ కొన్ని కంపెనీల లాభదాయకతపై ఈ ప్రభావం కనిపించింది.
లోహ రంగంలో నిఫ్టీ మెటల్ సూచీ 13,000 స్థాయిని తిరిగి అందుకోవడం సానుకూల సంకేతంగా భావిస్తున్నారు. పారిశ్రామిక అవసరాలకు ఉపయోగించే లోహాల ధరలు పెరగడం ఈ రంగంలోని షేర్లకు మద్దతుగా నిలవొచ్చు.
నిఫ్టీ బ్యాంక్ సూచీ స్థిరంగా కొనసాగే అవకాశం ఉంది. బలమైన రుణ వృద్ధి, కీలక బ్యాంకింగ్ షేర్లలో ఇటీవల చోటుచేసుకున్న దిద్దుబాటుతో కొనుగోళ్లకు ఆస్కారం ఏర్పడింది. నిఫ్టీ బ్యాంక్కు 57,381.10 వద్ద మద్దతు, 57,962.90 వద్ద నిరోధం ఉన్నాయి.
రెండు వారాల నష్టాల అనంతరం ఆటో రంగ షేర్లలో కొంత పునరుజ్జీవనం కనిపించే అవకాశం ఉంది. సమీపకాలంలో ఈ రంగంపై అంచనాలు సానుకూలంగా ఉన్నప్పటికీ, తదుపరి దిశ స్పష్టమయ్యే ముందు కొంత స్థిరీకరణ జరిగే అవకాశమూ ఉంది.
పశ్చిమాసియా పరిణామాలు ఇంకా అనిశ్చితంగానే ఉండటంతో సిమెంట్ షేర్లలో పెద్దగా కదలికలు లేకపోవచ్చు. గిరాకీ పుంజుకోవడం, మౌలిక వసతులపై పెట్టుబడులు పెరగడం వంటి అంశాలే ఈ రంగం తదుపరి పనితీరును నిర్ణయించనున్నాయి.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews Wellness WorldNews
