మందుల వాడకంలో చిన్న పొరపాటు.. ఆరోగ్యంపై పెద్ద ప్రభావం

ద్యులు సూచించిన మందులను ఎలా తీసుకోవాలి, భోజనానికి ముందు తీసుకోవాలా.. తర్వాత తీసుకోవాలా అనే విషయాలను సాధారణంగా ముందుగానే తెలుసుకుంటాం. అయితే కొన్నిసార్లు నిర్లక్ష్యంగా వ్యవహరించి, ఖాళీ కడుపుతో లేదా నిర్ణీత సమయాన్ని పాటించకుండా మందులు తీసుకునే అవకాశం ఉంటుంది. ఇలాంటి అలవాట్లు కొన్ని సందర్భాల్లో ఆరోగ్యంపై ప్రతికూల ప్రభావం చూపే అవకాశం ఉందని నిపుణులు సూచిస్తున్నారు.

మందుల విషయంలో ముందుగా వైద్యుల సూచనలను స్పష్టంగా తెలుసుకోవాలి. థైరాయిడ్‌ వంటి కొన్ని మందులను ఖాళీ కడుపుతో తీసుకోవాలని వైద్యులు సూచిస్తారు. అయితే ప్రతి మందుకూ ఇదే నియమం వర్తించదు. అందువల్ల ఏ ఔషధాన్ని ఎప్పుడు, ఎలా తీసుకోవాలో సంబంధిత వైద్యుడు లేదా ఔషధ నిపుణుడిని అడిగి తెలుసుకోవడం ముఖ్యం.

మందులను ప్రతిరోజూ ఒకే నిర్ణీత సమయంలో తీసుకోవడం కూడా చికిత్సలో కీలకమైన అంశం. వైద్యులు సూచించిన మోతాదు, సమయాన్ని స్వయంగా మార్చకూడదు. మందులు వేసుకున్న తర్వాత అసౌకర్యం లేదా ఇతర సమస్యలు కనిపిస్తే కూడా సొంతంగా మందులు ఆపకుండా వైద్యులను సంప్రదించాలి.

ఇక ఒక ఆరోగ్య సమస్యకు చికిత్స తీసుకుంటూనే మరో సమస్యకు మందులు వాడుతున్నవారు మరింత అప్రమత్తంగా ఉండాలి. ఒకేసారి తీసుకునే మందులు పరస్పరం ప్రభావం చూపే అవకాశం ఉన్నందున, ప్రస్తుతం వాడుతున్న అన్ని మందుల వివరాలను వైద్యులకు తెలియజేయాలి. ఇతర చికిత్సలు, థెరపీలు తీసుకుంటున్నా వాటి గురించి కూడా వైద్యుడికి చెప్పడం అవసరం.

ఏ ఆరోగ్య సమస్యకైనా సొంత వైద్యం చేయడం మంచిది కాదు. ఇతరులు ఉపయోగించిన మందులను వారి సలహాతో తీసుకోవడం, పాత ప్రిస్క్రిప్షన్‌ ఆధారంగా స్వయంగా మందులు కొనసాగించడం కూడా నివారించాలి. వైద్యుల సూచనల మేరకు మందులను సరైన మోతాదులో, సరైన సమయంలో తీసుకోవడం ద్వారా అనవసరమైన దుష్ప్రభావాల ప్రమాదాన్ని తగ్గించుకోవచ్చు.