పీరియడ్స్‌లో జలుబు, తలనొప్పి, అలసట.. అసలు కారణమేంటి?

నెలసరి సమయంలో కడుపునొప్పి, నడుంనొప్పి, నీరసం వంటి సమస్యలు చాలామందిలో కనిపిస్తుంటాయి. అయితే కొందరిలో వీటితో పాటు జ్వరం వచ్చినట్లు అనిపించడం, తలనొప్పి, ఒళ్లు నొప్పులు, జలుబు, వికారం వంటి ఫ్లూ తరహా లక్షణాలు కూడా కనిపిస్తాయి. రుతుచక్రానికి ముందు లేదా సమయంలో కనిపించే ఈ లక్షణాల సముదాయాన్ని సాధారణంగా ‘పీరియడ్‌ ఫ్లూ’ అని పిలుస్తున్నారు.

హార్మోన్ల మార్పుల ప్రభావం :

నెలసరి రావడానికి కొన్ని రోజుల ముందు నుంచే కొందరిలో ఈ లక్షణాలు మొదలవుతాయి. మరికొందరిలో రుతుచక్రం ప్రారంభమైన తర్వాత కనిపిస్తాయి. నిపుణుల అభిప్రాయం ప్రకారం.. రుతుచక్రంలో చోటుచేసుకునే హార్మోన్ల మార్పులు, శరీరంలో జరిగే ఇతర మార్పులు ఈ అసౌకర్యాలకు కారణం కావచ్చు. ‘ప్రీ-మెన్‌స్ట్రువల్‌ సిండ్రోమ్‌’లో భాగంగానూ ఈ లక్షణాలు కనిపించే అవకాశం ఉంటుంది.

ఎలాంటి లక్షణాలు కనిపిస్తాయి?

పీరియడ్‌ ఫ్లూ లక్షణాలు ప్రతి ఒక్కరిలో ఒకే విధంగా ఉండవు. వ్యక్తుల శరీరతత్వం, రుతుచక్రాన్ని బట్టి లక్షణాల్లో మార్పులు ఉండొచ్చు. సాధారణంగా వికారం, విరేచనాలు లేదా మలబద్ధకం, అలసట, తలనొప్పి, ఒళ్లు నొప్పులు, కడుపుబ్బరం, నడుంనొప్పి వంటి సమస్యలు కనిపించవచ్చు. కొందరికి జ్వరం వచ్చినట్లు అనిపించడం, జలుబు లేదా చలి వంటి ఫ్లూ తరహా అనుభూతులు కూడా ఉండొచ్చు.

ఉపశమనం కోసం ఏం చేయాలి?

ఈ సమయంలో శరీరానికి తగిన విశ్రాంతి ఇవ్వడం, తగినంత నీరు తాగడం ఉపయోగకరంగా ఉంటుంది. శారీరక నొప్పులు ఉంటే వేడి లేదా చల్లని కాపడం ద్వారా ఉపశమనం పొందవచ్చు. నడక, తేలికపాటి యోగా, ధ్యానం వంటి కార్యకలాపాలు కూడా అసౌకర్యాన్ని తగ్గించడంలో సహాయపడవచ్చు.

ఆహారంలోనూ కొన్ని జాగ్రత్తలు పాటించడం మంచిది. క్యాల్షియం వంటి పోషకాలు లభించే ఆహారాన్ని తీసుకోవడంతో పాటు కెఫీన్‌, అధికంగా వేయించిన పదార్థాలు, మసాలా ఆహారాన్ని తగ్గించడం కొందరికి ప్రయోజనం కలిగించవచ్చు.

అయితే లక్షణాలు ప్రతి నెలా తీవ్రంగా కనిపిస్తుంటే, రోజువారీ పనులకు ఇబ్బంది కలిగిస్తుంటే లేదా విశ్రాంతి, సాధారణ జాగ్రత్తలతోనూ తగ్గకపోతే వైద్యులను సంప్రదించడం మంచిది. ఎందుకంటే ఇలాంటి లక్షణాలకు ఇతర ఆరోగ్య సమస్యలు కూడా కారణమయ్యే అవకాశం ఉంది. సరైన కారణాన్ని గుర్తించి తగిన చికిత్స పొందడం అవసరం.