మిసైల్‌ టెక్నాలజీ ఇక ప్రైవేటు కంపెనీల చేతికి

దేశీయ రక్షణ ఉత్పత్తి సామర్థ్యాన్ని మరింత పెంచే దిశగా కేంద్ర ప్రభుత్వం కీలక నిర్ణయం తీసుకుంది. రక్షణ పరిశోధన, అభివృద్ధి సంస్థ (డీఆర్‌డీఓ) అభివృద్ధి చేసిన సంప్రదాయ క్షిపణి వ్యవస్థలకు సంబంధించిన సాంకేతిక పరిజ్ఞానాన్ని అర్హత కలిగిన ప్రైవేటు సంస్థలకు బదిలీ చేసేందుకు రక్షణ మంత్రి రాజ్‌నాథ్‌ సింగ్‌ ఆమోదం తెలిపారు. మిసైళ్లను అభివృద్ధి దశ నుంచి భారీ ఉత్పత్తి దశకు వేగంగా తీసుకెళ్లడం ఈ నిర్ణయం ప్రధాన ఉద్దేశం.

ఇప్పటివరకు రక్షణ రంగంలో ప్రభుత్వ రంగ సంస్థలు కీలక పాత్ర పోషిస్తున్నాయి. ముఖ్యంగా భారత్‌ డైనమిక్స్‌ లిమిటెడ్‌ వివిధ రకాల క్షిపణి వ్యవస్థల తయారీలో ప్రధాన సంస్థగా ఉంది. నౌకా ఆధారిత మిసైళ్ల విషయంలో భారత్‌-రష్యా భాగస్వామ్యంతో ఏర్పడిన బ్రహ్మోస్‌ ఏరోస్పేస్‌ కూడా కీలక పాత్ర పోషిస్తోంది. అయితే రక్షణ అవసరాలు పెరుగుతున్న నేపథ్యంలో ఉత్పత్తి సామర్థ్యాన్ని మరింత విస్తరించాల్సిన అవసరం ఏర్పడింది.

ఈ నేపథ్యంలో ప్రైవేటు రంగాన్ని కూడా మిసైల్‌ తయారీలో భాగస్వామ్యం చేయాలని కేంద్రం నిర్ణయించింది. డీఆర్‌డీఓ అభివృద్ధి చేసిన ఎంపిక చేసిన సాంకేతికతలను పొందేందుకు భారతీయ ప్రైవేటు కంపెనీల మధ్య పోటీ బిడ్డింగ్‌ నిర్వహించనున్నారు. ఈ ప్రక్రియలో ఎంపికైన సంస్థలు డీఆర్‌డీఓకు అభివృద్ధి, తయారీ భాగస్వాములుగా వ్యవహరించనున్నాయి.

అయితే అణ్వస్త్రాలను మోసుకెళ్లే వ్యూహాత్మక క్షిపణుల సాంకేతికతను ఈ బదిలీ పరిధిలోకి తీసుకురావడం లేదు. అగ్ని శ్రేణి వంటి వ్యూహాత్మక మిసైళ్లకు సంబంధించిన సాంకేతికత ప్రైవేటు సంస్థలకు అందుబాటులో ఉండదు. ప్రధానంగా వ్యూహాత్మకయేతర, సంప్రదాయ మిసైల్‌ వ్యవస్థలకు సంబంధించిన లైసెన్స్‌ టెక్నాలజీలను మాత్రమే బదిలీ చేయనున్నారు.

తక్కువ దూరం లక్ష్యాలను ఛేదించే ఎయిర్‌-డిఫెన్స్‌ మిసైళ్లు, యాంటీ-షిప్‌ మిసైళ్లు, ఇతర సంప్రదాయ క్షిపణి వ్యవస్థలు ఈ ప్రక్రియలో భాగం కానున్నాయి. అస్త్ర వంటి ఎయిర్‌-టు-ఎయిర్‌ మిసైళ్లతో పాటు ప్రళయ్‌ వంటి సంప్రదాయ బాలిస్టిక్‌ మిసైల్‌ వ్యవస్థలకు సంబంధించిన ఉత్పత్తి సామర్థ్యాన్ని పెంచే అవకాశాలపై కూడా దృష్టి సారిస్తున్నట్లు సమాచారం.

ప్రైవేటు రంగం ప్రవేశంతో మిసైళ్ల ఉత్పత్తి వేగం పెరగడంతో పాటు తయారీ వ్యయం తగ్గే అవకాశం ఉంది. పెద్ద మొత్తంలో రక్షణ పరికరాలను దేశీయంగా తయారు చేసుకునే సామర్థ్యం పెరుగుతుంది. అంతేకాకుండా రక్షణ పరికరాల కోసం విదేశాలపై ఆధారపడే పరిస్థితిని తగ్గించేందుకు ఈ నిర్ణయం దోహదపడనుంది.

పశ్చిమాసియాలో కొనసాగుతున్న ఘర్షణలు, రష్యా-ఉక్రెయిన్‌ యుద్ధం వంటి పరిణామాలు భారీ స్థాయిలో రక్షణ సామగ్రి అందుబాటులో ఉండాల్సిన అవసరాన్ని స్పష్టం చేశాయి. ఈ నేపథ్యంలో దేశీయంగా క్షిపణుల ఉత్పత్తి సామర్థ్యాన్ని పెంచడం వ్యూహాత్మకంగా కీలకంగా మారింది. రక్షణ రంగంలో ప్రైవేటు పరిశ్రమ సామర్థ్యాన్ని వినియోగించుకోవడం ద్వారా భారత్‌ తన రక్షణ ఉత్పత్తి వ్యవస్థను మరింత బలోపేతం చేసుకోవాలని భావిస్తోంది.