వివాదం ముదిరింది.. కృతి సనన్‌ రాఖీ యాడ్‌ను తొలగించిన ‘జివ’

రాఖీ పండగ సందర్భంగా ప్రముఖ జ్యువెలరీ బ్రాండ్‌ ‘జివ’ విడుదల చేసిన ప్రత్యేక ప్రకటన వివాదానికి దారితీసింది. నటి కృతి సనన్‌ నటించిన ఈ యాడ్‌లో ఆమె వస్త్రధారణ, పెంపుడు శునకానికి రాఖీ కట్టే సన్నివేశంపై సోషల్‌ మీడియాలో తీవ్ర విమర్శలు వ్యక్తమయ్యాయి. ఈ అంశం రాజకీయంగానూ చర్చకు దారితీయడంతో సంస్థ తాజాగా కీలక నిర్ణయం తీసుకుంది.

వివాదం నేపథ్యంలో కృతి సనన్‌ నటించిన రాఖీ ప్రకటనను అన్ని మాధ్యమాల నుంచి తొలగిస్తున్నట్లు ‘జివ’ ప్రకటించింది. భారతీయ సంస్కృతి, సంప్రదాయాలు, పండగలంటే తమకు ఎంతో గౌరవమని సంస్థ పేర్కొంది. రాఖీ పండగను కుటుంబ సభ్యులంతా కలిసి జరుపుకోవాలనే ఉద్దేశంతోనే ఈ ప్రకటన రూపొందించామని తెలిపింది.

పెంపుడు జంతువులపై ప్రేమను కూడా చాటాలనే ఉద్దేశంతో యాడ్‌లో శునకానికి రాఖీ కట్టే సన్నివేశాన్ని చూపించినట్లు సంస్థ వివరించింది. అయితే, ప్రకటన వల్ల సమాజంలోని కొన్ని వర్గాల మనోభావాలు దెబ్బతిన్నాయని గుర్తించినట్లు తెలిపింది. ఇది ఉద్దేశపూర్వకంగా చేసినది కాదని స్పష్టం చేస్తూ.. యాడ్‌ను అన్ని ప్లాట్‌ఫామ్‌ల నుంచి తొలగిస్తున్నట్లు వెల్లడించింది.

రాఖీ యాడ్‌ విడుదలైన తర్వాత కృతి సనన్‌ వస్త్రధారణపై పలువురు సోషల్‌ మీడియా వేదికగా అభ్యంతరాలు వ్యక్తం చేశారు. సంప్రదాయ భారతీయ పండగకు తగిన విధంగా దుస్తులు ధరించలేదంటూ నటి, భాజపా ఎంపీ కంగనా రనౌత్‌ తీవ్రంగా స్పందించారు. కృతి యాడ్‌పై ఆమె చేసిన వ్యాఖ్యలు సోషల్‌ మీడియాలో చర్చకు దారితీశాయి.

మరోవైపు కృతికి కాంగ్రెస్‌ అగ్రనేత రాహుల్‌ గాంధీ మద్దతుగా నిలిచారు. దీంతో కంగనా రనౌత్‌ మరోసారి స్పందిస్తూ రాహుల్‌ గాంధీపై కౌంటర్‌ ఇచ్చారు. ఈ క్రమంలో కృతి సనన్‌ రాఖీ యాడ్‌ వివాదం మరింత రాజకీయ రంగు పులుముకుంది.

సోషల్‌ మీడియాలో విమర్శలు, రాజకీయ నేతల మధ్య పరస్పర వ్యాఖ్యలు కొనసాగుతున్న సమయంలో ‘జివ’ ప్రకటనను తొలగిస్తూ నిర్ణయం తీసుకుంది. ఈ సందర్భంగా రాఖీ పండగను అందరూ సంతోషంగా జరుపుకోవాలని సంస్థ ఆకాంక్షించింది.