లైబ్రరీ సైన్స్‌ చదివితే.. ఉద్యోగాలెన్నో!

పుస్తకాలు, సమాచార వనరుల నిర్వహణపై ఆసక్తి ఉన్న విద్యార్థులకు లైబ్రరీ సైన్స్‌ మంచి కెరీర్‌ మార్గంగా నిలుస్తోంది. సంప్రదాయ గ్రంథాలయాలకే పరిమితం కాకుండా ప్రస్తుతం డిజిటల్‌ లైబ్రరీలు, ఈ-బుక్స్‌, ఆన్‌లైన్‌ డేటాబేస్‌లు, సమాచార సాంకేతికత వంటి విభాగాలు కూడా ఈ రంగంలో భాగమయ్యాయి.

ఇంటర్మీడియట్‌ పూర్తిచేసినవారు సర్టిఫికెట్‌ ఇన్‌ లైబ్రరీ అండ్‌ ఇన్ఫర్మేషన్‌ సైన్స్‌ వంటి స్వల్పకాలిక కోర్సులను ఎంచుకోవచ్చు. పుస్తకాల వర్గీకరణ, పట్టికీకరణ, గ్రంథాలయ రికార్డుల నిర్వహణ, పాఠకులకు సేవలు అందించడం వంటి ప్రాథమిక అంశాలను ఇందులో నేర్పిస్తారు. ఈ కోర్సుతో లైబ్రరీ అసిస్టెంట్‌ వంటి ప్రారంభ స్థాయి ఉద్యోగాలకు ప్రయత్నించవచ్చు.

ఏదైనా డిగ్రీ పూర్తిచేసిన తర్వాత బ్యాచిలర్‌ ఆఫ్‌ లైబ్రరీ అండ్‌ ఇన్ఫర్మేషన్‌ సైన్స్‌ (బీఎల్‌ఐఎస్సీ) చేయవచ్చు. సాధారణంగా ఏడాది వ్యవధి ఉండే ఈ కోర్సులో గ్రంథాలయ నిర్వహణతో పాటు కంప్యూటర్‌ ఆధారిత లైబ్రరీ వ్యవస్థలు, సమాచార వనరుల నిర్వహణ, వర్గీకరణ వంటి అంశాలను అధ్యయనం చేస్తారు. ఈ అర్హతతో అసిస్టెంట్‌ లైబ్రేరియన్‌, టెక్నికల్‌ అసిస్టెంట్‌, ప్రొఫెషనల్‌ అసిస్టెంట్‌ వంటి ఉద్యోగాలకు దరఖాస్తు చేసే అవకాశం ఉంటుంది.

బీఎల్‌ఐఎస్సీ తర్వాత మాస్టర్‌ ఆఫ్‌ లైబ్రరీ అండ్‌ ఇన్ఫర్మేషన్‌ సైన్స్‌ (ఎంఎల్‌ఐఎస్సీ) చదివితే మరిన్ని అవకాశాలు అందుబాటులోకి వస్తాయి. డిజిటల్‌ లైబ్రరీల నిర్వహణ, పరిశోధనా పద్ధతులు, సమాచార సాంకేతికత, ఆధునిక సమాచార నిర్వహణ వంటి అంశాల్లో ఉన్నత స్థాయి పరిజ్ఞానం లభిస్తుంది. దీంతో లైబ్రేరియన్‌, డిప్యూటీ లైబ్రేరియన్‌, ఇన్ఫర్మేషన్‌ ప్రొఫెషనల్‌, రీసెర్చ్‌ సంబంధిత పోస్టులకు అర్హత సాధించవచ్చు.

ప్రభుత్వ రంగంలో పబ్లిక్‌ లైబ్రరీలు, పాఠశాలలు, కళాశాలలు, విశ్వవిద్యాలయాలు, పరిశోధనా సంస్థలు, శిక్షణా సంస్థల్లో ఉద్యోగ అవకాశాలు ఉంటాయి. ప్రైవేటు విద్యాసంస్థలు, పరిశోధనా కేంద్రాలు, ప్రచురణ సంస్థలు, కార్పొరేట్‌ సంస్థల్లోనూ సమాచార నిర్వహణకు సంబంధించిన ఉద్యోగాలు లభిస్తున్నాయి.

ప్రస్తుతం లైబ్రేరియన్ల పాత్ర కూడా మారుతోంది. గ్రంథాలయ ఆటోమేషన్‌, డిజిటల్‌ కంటెంట్‌ నిర్వహణ, ఆన్‌లైన్‌ సమాచార వనరుల శోధన, ఈ-జర్నల్స్‌, ఈ-బుక్స్‌, డేటాబేస్‌ల నిర్వహణ వంటి నైపుణ్యాలకు ప్రాధాన్యం పెరుగుతోంది. అందువల్ల లైబ్రరీ సైన్స్‌తో పాటు కంప్యూటర్‌, ఇన్ఫర్మేషన్‌ టెక్నాలజీపై అవగాహన పెంచుకుంటే కెరీర్‌లో మరింత మెరుగైన అవకాశాలను అందిపుచ్చుకోవచ్చు.