దావూద్‌తో ఆ ఫొటో.. నా కెరీర్‌నే దెబ్బతీసింది: మందాకిని

దావూద్‌ ఇబ్రహీంతో కలిసి ఉన్న ఓ వైరల్‌ ఫొటో తన సినీ కెరీర్‌పై తీవ్ర ప్రభావం చూపిందని బాలీవుడ్‌ నటి మందాకిని తెలిపారు. కొన్నేళ్ల క్రితం దుబాయ్‌లో క్రికెట్‌ మ్యాచ్‌ సందర్భంగా దావూద్‌ పక్కన ఆమె కూర్చున్న ఫొటో బయటకు రావడంతో అప్పట్లో తీవ్ర చర్చ జరిగింది. తాజాగా ఓ మీడియా ఇంటర్వ్యూలో ఆ ఘటనపై ఆమె మరోసారి స్పందించారు.

ఓ షోలో పాల్గొనేందుకు తాను దుబాయ్‌ వెళ్లిన సమయంలో అనుకోకుండా క్రికెట్‌ స్టేడియానికి వెళ్లాల్సి వచ్చిందని మందాకిని చెప్పారు. అదే సమయంలో దావూద్‌ ఇబ్రహీంతో మాట్లాడినట్లు తెలిపారు. అయితే, తాను ప్రత్యేకంగా ఆయనను కలవడానికి వెళ్లలేదని, దావూద్‌ కూడా తనను దుబాయ్‌కు ఆహ్వానించలేదని స్పష్టం చేశారు.

“ఒక నటిగా మనం ఎవరితో మాట్లాడాలన్నది ఎప్పుడూ మన చేతుల్లో ఉండదు. చాలా మంది వచ్చి పలకరిస్తుంటారు. ఆ సందర్భంలో కూడా అదే జరిగింది. అయితే, ఆ ఒక్క ఫొటో ఇంత పెద్ద వివాదానికి దారితీస్తుందని ఊహించలేదు” అని మందాకిని పేర్కొన్నారు.

ఆ సమయంలో ఈ వివాదాన్ని ఎలా ఎదుర్కోవాలో తనకు తెలియలేదని ఆమె చెప్పారు. అప్పుడే దీనిపై వివరణ ఇచ్చినప్పటికీ, వివాదం మాత్రం కొనసాగిందన్నారు. ఆ ఫొటో తన కెరీర్‌ను తీవ్రంగా దెబ్బతీసిందని తెలిపారు.

1980ల కాలంలో బాలీవుడ్‌ చిత్రాలకు అండర్‌వరల్డ్‌ నుంచి నిధులు అందుతున్నాయనే అంశంపై తనకు అప్పట్లో ఎలాంటి అవగాహన లేదని మందాకిని వెల్లడించారు. సినిమాలు, వార్తల ద్వారా మాత్రమే ఆ విషయాల గురించి తెలుసుకున్నానని చెప్పారు.

మందాకిని 1985లో రాజ్‌ కపూర్‌ దర్శకత్వంలో తెరకెక్కిన ‘రామ్‌ తేరీ గంగా మైలీ’ చిత్రంతో కథానాయికగా సినీరంగ ప్రవేశం చేశారు. ఈ చిత్రం విజయవంతం కావడంతో ఆమెకు బాలీవుడ్‌లో మంచి గుర్తింపు వచ్చింది. అనంతరం పలు హిందీ చిత్రాల్లో నటించిన ఆమె తెలుగు ప్రేక్షకులకు కూడా సుపరిచితమే. ‘సింహాసనం’, ‘భార్గవ రాముడు’ వంటి చిత్రాల్లో నటించి మెప్పించారు.