తుడక్కమ్‌ రివ్యూ: విస్మయ యాక్షన్‌ అదుర్స్‌.. థ్రిల్‌ ఎలా ఉందంటే?

మోహన్‌లాల్‌ కుమార్తె విస్మయ మోహన్‌లాల్‌ కథానాయికగా పరిచయమైన మలయాళ చిత్రం ‘తుడక్కమ్‌’. జుడే ఆంథోని జోసెఫ్‌ తెరకెక్కించిన ఈ సర్వైవల్‌ థ్రిల్లర్‌ జియో హాట్‌స్టార్‌లో తెలుగు సహా పలు భాషల్లో స్ట్రీమింగ్‌ అవుతోంది. తండ్రి, కుమార్తె అనుబంధం, ఓ యువతి అదృశ్యం, పోలీసుల దర్యాప్తు, ఆమె ఎదుర్కొన్న పరిస్థితులు.. ఇలా పలు అంశాలతో కథ సాగుతుంది.

మీనూ పాత్రలో విస్మయ మోహన్‌లాల్‌ తొలి చిత్రంలోనే తన నటనతో ఆకట్టుకుంది. ప్రథమార్ధంలో సాధారణ యువతిగా కనిపించిన ఆమె.. కథ కీలక మలుపు తిరిగిన తర్వాత యాక్షన్‌, భావోద్వేగ సన్నివేశాల్లో మెప్పించింది. ముఖ్యంగా ద్వితీయార్ధంలో ఆమె పాత్రలో వచ్చే మార్పు సినిమాకు ప్రధాన ఆకర్షణగా నిలుస్తుంది.

మీనూ అదృశ్యమైన తర్వాత ప్రారంభమయ్యే పోలీస్‌ దర్యాప్తు కథకు ఉత్కంఠను తీసుకొస్తుంది. ఒకవైపు పోలీసుల ఇన్వెస్టిగేషన్‌, మరోవైపు మీనూకు ఎదురైన పరిస్థితులను చూపిస్తూ దర్శకుడు కథను ముందుకు నడిపించాడు. విరామ సమయంలో వచ్చే ట్విస్ట్‌ కథను మరో మలుపు తిప్పుతుంది. ఆ తర్వాత సినిమా రివెంజ్‌ డ్రామా వైపు సాగుతుంది.

మహిళలపై సమాజం, సోషల్‌ మీడియా ఎలా స్పందిస్తాయన్న అంశాన్ని కూడా దర్శకుడు కథలో ప్రస్తావించాడు. చిన్న సంఘటనలు ఎలా పెద్ద చర్చగా మారుతాయో చూపిస్తూ సమకాలీన అంశాలను కథలో మేళవించాడు. మోహన్‌లాల్‌ అతిథి పాత్రలో కనిపించి ఆకట్టుకుంటారు. ప్రతినాయకుడిగా అనీశ్‌ జోయ్‌ సంభాషణలు లేకుండానే హావభావాలతో భయపెట్టాడు.

అయితే కథావస్తువు పరిమితంగా ఉండటం, ప్రారంభ భాగం నెమ్మదిగా సాగడం, కొన్ని పాటలు కథ వేగాన్ని తగ్గించడం ప్రతికూలతలుగా కనిపిస్తాయి. మొత్తంగా ద్వితీయార్ధంలోని యాక్షన్‌, విస్మయ నటన, సందేశాత్మక అంశాలు ‘తుడక్కమ్‌’ను ఓసారి చూడదగ్గ సర్వైవల్‌ థ్రిల్లర్‌గా నిలబెడతాయి.