రివ్యూ: ‘సీక్రెట్‌ సోల్జర్‌’.. తెలుగు స్పై థ్రిల్లర్‌ ఎలా ఉందంటే?

‘సీక్రెట్‌ సోల్జర్‌’.. స్నేహం, దేశభక్తి, గూఢచర్యం నేపథ్యంలో తెరకెక్కిన తెలుగు స్పై థ్రిల్లర్‌. నెల్లూరుకు చెందిన మీరావలి, పృథ్వీ అనే ఇద్దరు స్నేహితుల చుట్టూ కథ మొదలవుతుంది. సైన్యంలో చేరాలనేది మీరావలి కల. ఆ కల నెరవేరకపోయినా.. అనుకోని పరిస్థితుల్లో దేశం కోసం ఓ కీలకమైన మిషన్‌లో గూఢచారిగా మారతాడు. ఆ మిషన్‌ ఏంటి? అందులో అతని స్నేహితుడు పృథ్వీ పాత్ర ఏమిటి? వారిని వెంటాడే శత్రువులు ఎవరు? అనే ప్రశ్నలకు సమాధానమే ఈ సినిమా.

ప్రథమార్ధంలో ఇద్దరు స్నేహితుల అనుబంధం, వారి నేపథ్యం, సహజమైన హాస్యంతో కథ నడుస్తుంది. దీంతో అసలు స్పై డ్రామాలోకి వెళ్లేందుకు కొంత సమయం పడుతుంది. విరామానికి ముందు వచ్చే కీలక మలుపు సినిమాపై ఆసక్తిని పెంచుతుంది. ద్వితీయార్ధంలో గూఢచర్యం, మిషన్‌, అనూహ్యమైన శత్రువులు, సాహసాలతో కథ వేగం పుంజుకుంటుంది.

అయితే స్పై థ్రిల్లర్‌కు అవసరమైన గాఢత, సీరియస్‌నెస్‌ కొన్ని సన్నివేశాల్లో కనిపించదు. కథానాయకుడు శత్రువుల చేతుల్లో పావులా కనిపించడం, అతని సొంత తెగువ, సాహసాలను బలంగా చూపించకపోవడం కొంత నిరాశ కలిగిస్తుంది. దేశ భద్రతకు సంబంధించిన సున్నితమైన అంశాల్ని కొన్ని చోట్ల మరీ సినిమాటిక్‌గా చూపించారు.

నిహాల్‌ కోదాటి, సూర్య శ్రీనివాస్‌ తమ పాత్రల్లో చక్కగా ఒదిగిపోయారు. ముఖ్యంగా ఇద్దరి మధ్య స్నేహం సినిమాకు ప్రధాన బలంగా నిలుస్తుంది. హర్షిత బండ్లమూరి, శిరీష నూలు పాత్రలు ఆకట్టుకుంటాయి. పలువురు సీనియర్‌ నటులు కనిపించినా.. వారి పాత్రలకు పెద్దగా ప్రాధాన్యం దక్కలేదు. సంగీతం, ఛాయాగ్రహణం బాగున్నాయి. నిడివి తక్కువే అయినప్పటికీ కొన్ని సన్నివేశాలు సాగదీతగా అనిపిస్తాయి.

మొత్తంగా అరుదైన నేపథ్యాన్ని ఎంచుకున్న ‘సీక్రెట్‌ సోల్జర్‌’.. కథ, మలుపుల విషయంలో ఆసక్తి కలిగించినా, కథనంలో మరింత బలం, నమ్మకం అవసరమైన చిత్రంగా నిలుస్తుంది.