20 ఏళ్ల తర్వాత లయతో శివాజీ జోడీ..కుటుంబ భావోద్వేగాల కథతో వస్తున్న శివాజీ కొత్త సినిమా..!!

గతేడాది ‘కోర్ట్‌’, ‘దండోరా’ సినిమాలతో మంచి విజయాలు అందుకున్న నటుడు శివాజీ ఇప్పుడు మరో కొత్త కథతో ప్రేక్షకుల ముందుకు వస్తున్నారు. ఆయన హీరోగా నటించిన ‘సాంప్రదాయిని సుప్పిని సుద్దపూసని’ చిత్రం ఈరోజు థియేటర్లలో విడుదల కానుంది. విజయవంతమైన ‘చి90స్‌’ వెబ్‌సిరీస్‌ తర్వాత ఈటీవీ విన్‌తో కలిసి చేసిన సినిమా ఇదే కావడం విశేషం. ఈ చిత్రాన్ని దర్శకుడు సుధీర్‌ శ్రీరామ్‌ తెరకెక్కించారు.

నవ్వులు, భావోద్వేగాలతో నిండిన కథ

ఈ సినిమా ప్రేక్షకులను నవ్వించడమే కాకుండా కొన్ని సందర్భాల్లో టెన్షన్‌కు గురి చేస్తూ చివరికి మంచి అనుభూతిని అందిస్తుందని శివాజీ తెలిపారు. కుటుంబంతో కలిసి చూడదగ్గ చిత్రమిదని, ముఖ్యంగా ప్రేయసితో కలిసి చూసిన వారికి పెళ్లి తర్వాత జీవితం ఎలా ఉంటుందో అర్థమయ్యేలా సరదాగా చూపిస్తుందని చెప్పారు.

20 ఏళ్ల తర్వాత లయతో జోడీ

ఈ సినిమాలో శివాజీతో పాటు నటి లయ కూడా కీలక పాత్రలో కనిపించనున్నారు. దాదాపు 20 ఏళ్ల తర్వాత వీరిద్దరూ కలిసి నటించడం ప్రేక్షకుల్లో ఆసక్తి రేకెత్తిస్తోంది. మధ్యతరగతి కుటుంబ జీవితం, భార్యాభర్తల ఆలోచనల్లో వచ్చే భేదాలు, కుటుంబ బాధ్యతలు వంటి అంశాలను ఈ సినిమాలో ప్రతిబింబించినట్లు శివాజీ వెల్లడించారు.

కామన్ మాన్ కథ

ఈ చిత్రాన్ని తాను “కామన్ మ్యాన్ సినిమా”గా భావిస్తున్నానని శివాజీ అన్నారు. ఒక సాధారణ వ్యక్తి తన కుటుంబాన్ని కాపాడుకోవడానికి ఎదుర్కొనే సమస్యలు, వాటిని ఎలా అధిగమిస్తాడు అనే అంశాన్ని ఆసక్తికరంగా చూపించినట్లు తెలిపారు.

డబ్బులు కాదు.. మంచి కథలే ముఖ్యం

సినిమాను నిర్మించడంలో తన లక్ష్యం డబ్బు సంపాదించడం కాదని, మంచి కథను ప్రేక్షకులకు అందించాలన్నదే ఉద్దేశమని శివాజీ స్పష్టం చేశారు. మంచి కథలు, బలమైన పాత్రలే తనకు ముఖ్యమని, ప్రేక్షకుల మనసుల్లో నిలిచిపోయే పాత్రలు చేయాలని కోరుకుంటున్నానన్నారు.

మరో చాప్టర్‌కు సిద్ధం

ఈ సినిమా విజయవంతమైతే ఇదే కథకు మరో భాగాన్ని తీసుకురావాలని ఆలోచిస్తున్నట్లు శివాజీ వెల్లడించారు. ప్రస్తుతం ఆయన ‘ఎపిక్‌’, ‘లెనిన్‌’, ‘ప్రేమకు నమస్కారం’ వంటి చిత్రాల్లో నటిస్తూ బిజీగా ఉన్నారు.