అగ్నివీరుల శాశ్వత నియామకాల్లో పెంపు దిశగా భారత సైన్యం ప్రణాళికలు

అగ్నిపథ్ పథకం కింద నాలుగేళ్ల సేవా కాలం పూర్తయ్యాక అగ్నివీరుల శాశ్వత నియామకాలను పెంచే దిశగా భారత సైన్యం పరిశీలన ప్రారంభించింది. నౌకాదళం తమ అగ్నివీర్ సిబ్బందిలో సుమారు 75 శాతం మందిని కొనసాగించేందుకు చర్యలు తీసుకుంటున్నట్లు జాతీయ మీడియా కథనాలు పేర్కొన్నాయి.

అదేవిధంగా ఆర్మీ, వాయుసేనల్లో ప్రస్తుతం ఉన్న 25 శాతం శాశ్వత నియామక పరిమితిని 50 శాతానికి పెంచే అవకాశం ఉన్నట్లు సమాచారం. ఈ మార్పుల ద్వారా శిక్షణ పొందిన, అనుభవం కలిగిన సిబ్బందిని ఎక్కువ సంఖ్యలో కొనసాగించవచ్చని అధికారులు భావిస్తున్నారు.

ఆర్మీలో ఇటీవల ఏర్పాటు చేసిన ‘భైరవ్ బెటాలియన్లు’ వంటి ప్రత్యేక యూనిట్లలో అగ్నివీరులను కొనసాగించే యోచన కూడా ఉన్నట్లు తెలుస్తోంది. 2023లో సైన్యంలో చేరిన మొదటి బ్యాచ్ అగ్నివీరుల నాలుగేళ్ల పదవీకాలం ఈ ఏడాది చివర్లో ముగియనుండటంతో ఈ అంశంపై చర్చలు వేగవంతమయ్యాయి.

ప్రస్తుతం అగ్నివీరులు నాలుగేళ్లు సేవలందించిన తర్వాత ప్రతిభ, అవసరాల ఆధారంగా కేవలం 25 శాతం మందిని మాత్రమే శాశ్వతంగా నియమిస్తున్నారు. మిగిలిన వారికి ఆర్థిక ప్యాకేజీతో పాటు నైపుణ్య ధ్రువీకరణ పత్రాలు అందజేస్తున్నారు.

శిక్షణ పొందిన సిబ్బందిని కొనసాగించడం వల్ల ఆధునిక ఆయుధాలు, సాంకేతిక వ్యవస్థలపై అవగాహన కలిగిన అనుభవజ్ఞుల సంఖ్య పెరుగుతుందని సైనిక వర్గాలు భావిస్తున్నాయి. త్రివిధ దళాల్లో సిబ్బంది కొరతను తీర్చేందుకు కూడా ఈ నిర్ణయం ఉపయోగపడుతుందని అంచనా వేస్తున్నారు.

ఈ మార్పులపై త్రివిధ దళాల ఉన్నతాధికారులు చర్చలు జరుపుతున్నప్పటికీ, దీనిపై అధికారిక ప్రకటన ఇంకా వెలువడాల్సి ఉంది.