కేన్స్ ఫిల్మ్ ఫెస్టివల్‌కు ఐశ్వర్య రాయ్ బయల్దేరింది

సందడిగా జరిగే కేన్స్ ఫిల్మ్ ఫెస్టివల్‌లో ఐశ్వర్య రాయ్ (Aishwarya Rai) ఎప్పుడూ ప్రత్యేక ఆకర్షణగా నిలుస్తుంటారు. అయితే ఈసారి ఆమె ఈ వేడుకకు హాజరుకావడం లేదంటూ గత కొన్ని రోజులుగా సోషల్ మీడియాలో ప్రచారం జరిగింది. ఈ రూమర్స్‌కు చెక్ పెడుతూ, ఐశ్వర్య తన కుమార్తెతో కలిసి ఫ్రాన్స్‌కు బయల్దేరినట్లు సమాచారం. దీంతో ఈసారి కూడా కేన్స్‌లో ఆమె సందడి ఖాయం అన్న అంచనాలు పెరిగాయి. ముఖ్యంగా ఫెస్టివల్ చివరి రోజుల్లో ఆమె రెడ్ కార్పెట్‌పై కనిపించనుందని తెలుస్తోంది.

ఒక ప్రముఖ బ్రాండ్ తరఫున ప్రతి ఏడాది కేన్స్ (Cannes) ఫిల్మ్ ఫెస్టివల్‌లో రెడ్ కార్పెట్‌పై మెరుస్తూ వచ్చే ఐశ్వర్య ఈసారి ప్రచార చిత్రాల్లో కనిపించకపోవడంతో ఊహాగానాలు మరింత పెరిగాయి. ఆమె స్థానంలో బాలీవుడ్ నటి అలియా భట్ పాల్గొంటున్నారనే వార్తలు కూడా సోషల్ మీడియాలో చక్కర్లు కొట్టాయి. దీంతో ఐశ్వర్య అభిమానులు కొంత నిరాశకు గురయ్యారు. అయితే తాజాగా ముంబయి ఎయిర్‌పోర్ట్‌లో ఆమె కనిపించడంతో ఈ వార్తలకు తెరపడింది. అభిమానులు ఆమె రాకపై ఆనందం వ్యక్తం చేస్తున్నారు.

ఈసారి కేన్స్‌లో ఐశ్వర్య ఎలాంటి లుక్‌తో రెడ్ కార్పెట్‌పై మెరుస్తారన్న ఆసక్తి అభిమానుల్లో ఎక్కువగా ఉంది. ప్రతి సంవత్సరం తన ప్రత్యేకమైన ఫ్యాషన్ ఎంపికలతో వార్తల్లో నిలిచే ఐశ్వర్య, గ్లామర్‌తో పాటు భారతీయతను ప్రతిబింబించే లుక్స్‌తో కూడా గుర్తింపు తెచ్చుకున్నారు. 2002లో మొదటిసారి కేన్స్‌లో పాల్గొన్న ఆమె అప్పటి నుంచి ప్రతి ఏడాది ఈ అంతర్జాతీయ వేదికపై తనదైన ముద్ర వేస్తూ వస్తున్నారు.

గతేడాది కూడా చీరలో, నుదుటిపై సింధూరంతో కేన్స్‌లో ఆమె చేసిన ఎంట్రీ ప్రపంచవ్యాప్తంగా చర్చనీయాంశమైంది. ఆ సమయంలో భారతీయ సంప్రదాయాన్ని ప్రతిబింబించేలా ఆమె లుక్ ఉండటం అభిమానులను ఎంతగానో ఆకట్టుకుంది. పహల్గాం దాడి నేపథ్యంలో భారత్ చేపట్టిన ‘ఆపరేషన్ సిందూర్’కు మద్దతుగా ఆమె చేసిన ఆ లుక్ ప్రత్యేకంగా గుర్తింపు పొందింది. ఇప్పుడు కూడా ఆమె ఈసారి ఏ రీతిలో ఆకట్టుకుంటారో అని సినీ ప్రేమికులు ఆసక్తిగా ఎదురుచూస్తున్నారు.