సీరియస్‌గానే ఆ ప్రశ్న నన్ను అడుగుతున్నారా?: ధోని భవితవ్యంపై సీఎస్‌కే కోచ్

ఐపీఎల్ 2026 సీజన్‌లో ఎంఎస్ ధోని ఒక్క మ్యాచ్ కూడా ఆడకపోవడం అభిమానులను నిరాశకు గురిచేసింది. మోకాలి గాయం తిరగబెట్టడంతో అతడు మైదానంలోకి దిగలేకపోయాడు. దీంతో వచ్చే సీజన్‌లో ధోని తిరిగి ఆడతాడా? అనే ప్రశ్నకు ఇప్పటివరకు సీఎస్‌కే శిబిరం నుంచి స్పష్టత రాలేదు. గుజరాత్ టైటాన్స్ చేతిలో ఓటమితో ఈ సీజన్‌ను ముగించిన తర్వాత ఈ అంశం మరింత చర్చనీయాంశమైంది.

మ్యాచ్ అనంతరం జరిగిన విలేకరుల సమావేశంలో సీఎస్‌కే బౌలింగ్ కోచ్ ఎరిక్ సిమన్స్‌ను ధోని భవిష్యత్తుపై ప్రశ్నించగా, ఆయన ఆసక్తికరంగా స్పందించారు. “నన్ను నిజంగానే ఈ ప్రశ్న అడుగుతున్నారా?” అంటూ నవ్వుతూ వ్యాఖ్యానించారు. ధోని ఆడతాడా లేదా అన్నది పూర్తిగా అతని వ్యక్తిగత నిర్ణయమని, జట్టు మాత్రం అతని రిటర్న్‌ను ఆశిస్తున్నట్లు తెలిపారు.

ధోని గురించి మాట్లాడుతూ, అతను నెట్స్‌లో మాత్రం అద్భుతంగా బ్యాటింగ్ చేశాడని, భారీ షాట్లు కూడా బాదాడని సిమన్స్ వెల్లడించారు. అయితే మోకాలి గాయం కారణంగా పరుగులు తీయడం కష్టంగా మారడంతో మైదానంలోకి దిగలేకపోయాడని వివరించారు. ధోని తన శరీర పరిస్థితిని బట్టి నిర్ణయం తీసుకుంటాడని, జట్టుకు ఏది మంచిదో అతడికి బాగా తెలుసని ఆయన అన్నారు.

అదే సమయంలో సీఎస్‌కే జట్టు నిర్మాణంపైనా కోచ్ మాట్లాడారు. జట్టును సమతుల్యంగా ఉంచడమే విజయానికి కీలకమని పేర్కొన్నారు. యువ ఆటగాళ్లతో కూడిన ఈ జట్టుకు అనుభవం పెరగాల్సిన అవసరం ఉందని చెప్పారు. కార్తిక్, ఉర్విల్, బ్రెవిస్, కాంబోజ్, ముకేశ్ చౌదరి వంటి యువ ఆటగాళ్లు ప్రతిభావంతులని, కానీ వారికి సమయం ఇవ్వాల్సిన అవసరం ఉందని అన్నారు.

గాయాలు కూడా జట్టును ప్రభావితం చేశాయని, కీలక సమయంలో జేమీ ఓవర్టన్, ఖలీల్ జట్టుకు దూరమవడం పెద్ద లోటుగా మారిందని సిమన్స్ పేర్కొన్నారు. మిడిల్ ఓవర్లలో ఓవర్టన్ బౌలింగ్ జట్టుకు ఎంతో ఉపయోగపడిందని ఆయన అభిప్రాయపడ్డారు.