నాడు "జగన్ ప్రమాదకారి".. నేడు "మా నాయకుడు": పాత క్లిప్పింగులతో బొత్స, ధర్మానలకు టీడీపీ చెక్!

విజయనగరం టీడీపీ కార్యాలయం వద్ద ఎంపీ కలిశెట్టి అప్పలనాయుడు, ఎమ్మెల్యే అదితి గజపతిరాజు చేపట్టిన ఈ వినూత్న ప్రదర్శన రాజకీయ వర్గాల్లో హాట్ టాపిక్‌గా మారింది. వైకాపా ముఖ్య నేతలు బొత్స సత్యనారాయణ, ధర్మాన ప్రసాదరావు గతంలో కాంగ్రెస్‌లో ఉన్నప్పుడు జగన్‌పై చేసిన పదునైన విమర్శలను నేరుగా వీడియోలు, పాత పత్రికా క్లిప్పింగుల రూపంలో బయటపెట్టారు.

జగన్ మోహన్ రెడ్డికి చిన్నప్పటి నుంచే నేరస్థులతో సంబంధాలు ఉన్నాయని, ఆయుధ వ్యాపారులతో సాన్నిహిత్యం ఉందని బొత్స గతంలో చేసిన వ్యాఖ్యలను వారు గుర్తు చేశారు. ముఖ్యంగా లోటస్ పాండ్, బెంగళూరు బంగళాల వెనుక ఉన్న ఆర్థిక మూలాలను ప్రశ్నిస్తూ, జగన్ దగ్గర టన్నుల కొద్దీ నల్లధనం ఉందని, అది దాచుకోవడానికే ఆయన రాజకీయాల్లోకి వచ్చారని బొత్స నాడు ఆరోపించిన విషయాన్ని సాక్ష్యాధారాలతో సహా నిరూపించారు. జగన్‌ను ముఖ్యమంత్రిని చేయకుండా సోనియా గాంధీ రాష్ట్రాన్ని కాపాడారని బొత్స కొనియాడిన వీడియోలు ప్రదర్శించడంతో పాత స్మృతులను కూటమి నేతలు మరోసారి తిరగతోడారు.

అదేవిధంగా, జగన్ కేవలం ఒక వ్యాపారవేత్త అని, ముఖ్యమంత్రి పదవిని అడ్డం పెట్టుకుని మరింత దోచుకోవాలనేది ఆయన తాపత్రయమని ధర్మాన ప్రసాదరావు విమర్శించిన అంశాలను కూడా వెలుగులోకి తెచ్చారు. ఐదేళ్లలో 67 కంపెనీలు పెట్టిన ఘనత జగన్ దేనని, ఇలాంటి వారు ప్రజాస్వామ్యానికి ప్రమాదకరమని ధర్మాన హెచ్చరించిన క్లిప్పింగులను ఫ్లెక్సీల రూపంలో చుట్టుపక్కల ప్రదర్శించారు.

నాడు అంతటి ఘాటు విమర్శలు చేసిన బొత్స, ధర్మానలు.. ఇప్పుడు వైకాపాలో చేరి జగన్ అడుగులకు మడుగులొత్తుతున్నారని ఎంపీ కలిశెట్టి ఎద్దేవా చేశారు. తమ రాజకీయ ప్రయోజనాల కోసం ఊసరవెల్లిలా రంగులు మార్చి ఇప్పుడు జగన్‌ను వెనకేసుకొస్తున్నారని, వారి ఆత్మసాక్షిని ఒక్కసారి ప్రశ్నించుకోవాలని హితవు పలికారు. కూటమి ప్రభుత్వంపై విమర్శలు చేసే ముందు వారు గతంలో ఏమన్నారో గుర్తు తెచ్చుకోవాలని నేతలు హెచ్చరించారు.