ఇంజినీరింగ్‌ డిప్లొమాతో సీపీసీఎల్‌లో ఉద్యోగాలు

చెన్నై పెట్రోలియం కార్పొరేషన్‌ లిమిటెడ్‌ (సీపీసీఎల్‌) 60 జూనియర్‌ ఇంజినీరింగ్‌ అసిస్టెంట్‌ పోస్టుల భర్తీకి నోటిఫికేషన్‌ విడుదల చేసింది. ప్రొడక్షన్‌, మెకానికల్‌, ఎలక్ట్రికల్‌, ఇన్‌స్ట్రుమెంటేషన్‌ విభాగాల్లో ఈ ఖాళీలు ఉన్నాయి. సంబంధిత విభాగంలో మూడేళ్ల ఇంజినీరింగ్‌ డిప్లొమా పూర్తిచేసిన అభ్యర్థులు దరఖాస్తు చేసుకోవచ్చు.

అభ్యర్థుల ఎంపికను కంప్యూటర్‌ బేస్డ్‌ టెస్ట్‌ (సీబీటీ), ధ్రువపత్రాల పరిశీలన, స్కిల్‌/ప్రొఫిషియన్సీ/ఫిజికల్‌ టెస్టుల ద్వారా చేపడతారు. సీబీటీలో సాధించిన మెరిట్‌ ఆధారంగా తదుపరి దశలకు అభ్యర్థులను ఎంపిక చేస్తారు. ఒక్కో పోస్టుకు ముగ్గురు చొప్పున స్కిల్‌, ప్రొఫిషియన్సీ/ఫిజికల్‌ టెస్టులకు పిలుస్తారు. ఈ పరీక్షల్లో అర్హత సాధించడం తప్పనిసరి.

సీబీటీని మొత్తం 120 మార్కులకు ఆన్‌లైన్‌ విధానంలో నిర్వహిస్తారు. ప్రశ్నపత్రంలో రెండు భాగాలు ఉంటాయి. పార్ట్‌-1లో జనరల్‌ ఆప్టిట్యూడ్‌కు సంబంధించిన 50 ప్రశ్నలు ఉంటాయి. వెర్బల్‌ ఎబిలిటీ, జనరల్‌ నాలెడ్జ్‌, రీజనింగ్‌/లాజికల్‌ డిడక్షన్‌, న్యూమరికల్‌ ఎబిలిటీ అంశాల నుంచి ప్రశ్నలు వస్తాయి.

పార్ట్‌-2లో అభ్యర్థులు దరఖాస్తు చేసిన విభాగానికి సంబంధించిన సబ్జెక్ట్‌ ప్రశ్నలు 70 ఉంటాయి. పరీక్ష వ్యవధి రెండు గంటలు. ప్రతి ప్రశ్నకు ఒక మార్కు చొప్పున మొత్తం 120 మార్కులు ఉంటాయి. తప్పు సమాధానానికి 0.25 మార్కు చొప్పున నెగెటివ్‌ మార్కింగ్‌ ఉంటుంది.

సీబీటీలో అర్హత సాధించేందుకు జనరల్‌ కేటగిరీ అభ్యర్థులు కనీసం 40 శాతం మార్కులు పొందాలి. ఎస్సీ, ఎస్టీ, దివ్యాంగ అభ్యర్థులకు కనీస అర్హత మార్కులు 35 శాతంగా నిర్ణయించారు.

ఎంపికైన జూనియర్‌ ఇంజినీరింగ్‌ అసిస్టెంట్లకు నెలకు రూ.25,000 నుంచి రూ.1,05,000 వరకు వేతనం లభిస్తుంది. మూలవేతనంతో పాటు డీఏ, హెచ్‌ఆర్‌ఏ, పీఎఫ్‌, గ్రాట్యుటీ, ఎల్‌టీసీ/ఎల్‌ఎఫ్‌ఏ వంటి అదనపు ప్రయోజనాలు ఉంటాయి. వైద్య సదుపాయాలు, పదవీ విరమణ ప్రయోజనాలు కూడా సంస్థ నిబంధనల ప్రకారం అందిస్తారు.

స్కిల్‌/ప్రొఫిషియన్సీ/ఫిజికల్‌ టెస్టుల్లో అర్హత సాధించిన అభ్యర్థులకు వైద్య పరీక్షలు నిర్వహిస్తారు. అనంతరం కేటగిరీల వారీగా మెరిట్‌, నిబంధనల ఆధారంగా తుది ఎంపిక చేపడతారు. అర్హత, వయోపరిమితి, దరఖాస్తు తేదీలు, ఫీజు తదితర పూర్తి వివరాలను అభ్యర్థులు అధికారిక నోటిఫికేషన్‌లో పరిశీలించాలి.