వరుస ఓటములతో పంజాబ్ కింగ్స్‌పై విమర్శలు – స్పందించిన ప్రీతి జింటా

ఐపీఎల్ సీజన్ ఆరంభంలో వరుస విజయాలతో దూసుకెళ్లిన పంజాబ్ కింగ్స్, సెకండాఫ్‌లో మాత్రం వరుస ఓటములతో ఇబ్బందుల్లో పడింది. నాలుగో వరుస ఓటమితో ప్లేఆఫ్ అవకాశాలు సంక్లిష్టంగా మారాయి.

ఈ నేపథ్యంలో జట్టు ప్రదర్శనపై సోషల్ మీడియాలో తీవ్ర విమర్శలు వెల్లువెత్తుతున్నాయి. ఆటగాళ్ల మధ్య క్రమశిక్షణ, సమన్వయం లోపించిందని, అందుకే వరుస పరాజయాలు ఎదురవుతున్నాయని కొందరు నెటిజన్లు వ్యాఖ్యానిస్తున్నారు.

ఈ ప్రచారంపై పంజాబ్ కింగ్స్ సహ యజమాని ప్రీతి జింటా తీవ్ర ఆగ్రహం వ్యక్తం చేశారు. తప్పుడు కథనాలు వ్యాప్తి చేస్తే చర్యలు తప్పవని హెచ్చరించారు. ఆమె తన సోషల్ మీడియా పోస్టులో మాట్లాడుతూ, విమర్శలు మరియు అసత్య ప్రచారానికి మధ్య స్పష్టమైన తేడా ఉందని పేర్కొన్నారు. ఆటపై ఆరోగ్యకరమైన చర్చలను స్వాగతిస్తున్నామని, కానీ ఉద్దేశపూర్వకంగా అసత్య కథనాలు సృష్టించి జట్టు ప్రతిష్టకు భంగం కలిగిస్తే సహించబోమని స్పష్టం చేశారు. మీడియా మరియు సోషల్ మీడియా బాధ్యతాయుతంగా వ్యవహరించాలని ఆమె కోరారు.

అటు పంజాబ్ కింగ్స్ ఫ్రాంచైజీ కూడా అధికారికంగా స్పందించింది. క్రీడల్లో విమర్శలు, అభిప్రాయాలు సహజమే అయినా, పాపులారిటీ కోసం తప్పుడు కథనాలు సృష్టించడం సరైనది కాదని పేర్కొంది. వాస్తవాలను నిర్ధారించకుండా సమాచారం వ్యాప్తి చేయకూడదని సూచించింది.

ఇదిలా ఉండగా, ఇటీవల జట్టు ఆటగాడు యుజ్వేంద్ర చాహల్ విమానంలో ఈ-సిగరెట్ వినియోగించినట్లుగా ఉన్న దృశ్యాలు వైరల్ కావడం చర్చనీయాంశమైంది. అలాగే దిల్లీ క్యాపిటల్స్‌తో జరిగిన మ్యాచ్‌లో చాహల్‌కు ఒక్క ఓవర్ కూడా ఇవ్వకపోవడంతో కెప్టెన్ శ్రేయస్ అయ్యర్ వ్యూహంపై విమర్శలు వచ్చాయి. మరోవైపు ఓపెనర్ ప్రభ్‌సిమ్రన్ సింగ్ ఫిట్‌నెస్‌పై కూడా ప్రశ్నలు ఉత్పన్నమయ్యాయి.