గోదావరికి ఎట్టకేలకు వరద.. దేవీపట్నం వద్ద మారిన నది రంగు

ఎల్‌నినో ప్రభావంతో గత కొంతకాలంగా వర్షాభావ పరిస్థితులు నెలకొనడంతో వెలవెలబోయిన గోదావరి నది ఎట్టకేలకు మళ్లీ కళకళలాడుతోంది. గోదావరి ఎగువ పరీవాహక ప్రాంతాల్లో కురుస్తున్న భారీ వర్షాల ప్రభావంతో వరద నీరు క్రమంగా దిగువ ప్రాంతాలకు చేరుతోంది. దీంతో కొద్ది రోజులుగా నీటి కొరతతో కనిపించిన గోదావరి ఇప్పుడు ఉప్పొంగుతూ ప్రవహిస్తోంది.

అల్లూరి సీతారామరాజు జిల్లా దేవీపట్నం మండలం వద్ద గోదావరి నది నీటి రంగు మారడం ప్రత్యేక ఆకర్షణగా నిలిచింది. ఎగువ ప్రాంతాల నుంచి కొండ మట్టి, ఖనిజాలతో కూడిన నీరు చేరడంతో నదిలో నీలం, ఎరుపు రంగుల కలయిక కనిపిస్తోంది. ఈ అరుదైన దృశ్యాన్ని చూసేందుకు స్థానికులతో పాటు పర్యాటకులు కూడా పెద్ద సంఖ్యలో తరలివస్తున్నారు.

దేవీపట్నం సమీపంలోని గండి పోచమ్మ అమ్మవారి ఆలయం వద్ద వరద ఉద్ధృతి క్రమంగా పెరుగుతోంది. ఆలయ పరిసర ప్రాంతాల్లోకి వరద నీరు చేరడంతో అధికారులు అప్రమత్తమయ్యారు. భక్తుల రాకపోకలపై ప్రత్యేక దృష్టి సారించి అవసరమైన భద్రతా చర్యలు చేపట్టారు. ఆలయంలో హుండీ లెక్కింపు కార్యక్రమాన్ని అధికారులు ముందుగానే పూర్తి చేసి, విలువైన వస్తువులను సురక్షిత ప్రాంతాలకు తరలించినట్లు సమాచారం.

మరోవైపు ధవళేశ్వరం బ్యారేజీ వద్ద కూడా గోదావరి నీటిమట్టం క్రమంగా పెరుగుతోంది. ఎగువ ప్రాంతాల నుంచి వరద ప్రవాహం పెరుగుతుండటంతో బ్యారేజీ అధికార యంత్రాంగం పరిస్థితిని నిరంతరం పర్యవేక్షిస్తోంది. నీటి ప్రవాహాన్ని బట్టి గేట్ల నిర్వహణపై నిర్ణయాలు తీసుకునేందుకు అధికారులు సిద్ధంగా ఉన్నారు.

గోదావరి పరివాహక ప్రాంతాల్లో ఇంకా వర్షాలు కొనసాగుతున్న నేపథ్యంలో రానున్న రోజుల్లో వరద ఉద్ధృతి మరింత పెరిగే అవకాశం ఉందని అధికారులు అంచనా వేస్తున్నారు. లోతట్టు ప్రాంతాల ప్రజలు అప్రమత్తంగా ఉండాలని, నది పరిసర ప్రాంతాలకు అవసరం లేకుండా వెళ్లవద్దని సూచిస్తున్నారు. వరద పరిస్థితులను ఎప్పటికప్పుడు పరిశీలిస్తూ అవసరమైన సహాయక చర్యలు చేపట్టేందుకు జిల్లా యంత్రాంగం సిద్ధంగా ఉంది.