గాజా పాలన నుంచి తప్పుకుంటున్న హమాస్‌.. కీలక ప్రకటన

గాజా స్ట్రిప్‌లో దాదాపు రెండు దశాబ్దాలుగా కొనసాగుతున్న తమ పాలనా వ్యవస్థను రద్దు చేస్తున్నట్లు హమాస్‌ ప్రకటించింది. అమెరికా మధ్యవర్తిత్వంతో కుదిరిన కాల్పుల విరమణ ఒప్పందంలో భాగంగా గాజా పౌర పరిపాలనా బాధ్యతలను ఐక్యరాజ్యసమితి మద్దతుతో ఏర్పాటు కానున్న టెక్నోక్రాటిక్‌ కమిటీకి అప్పగించేందుకు అంగీకరించినట్లు తెలిపింది.

హమాస్‌ ప్రభుత్వ ఎమర్జెన్సీ కమిటీ అధిపతి మహ్మద్‌ అల్‌-ఫర్రా తన పదవికి రాజీనామా చేసినట్లు సంబంధిత వర్గాలు వెల్లడించాయి. కొత్త పరిపాలనా కమిటీకి ఎలాంటి అవాంతరాలు లేకుండా బాధ్యతలు బదిలీ చేయడమే లక్ష్యంగా ప్రస్తుత పాలక మండలిని రద్దు చేసినట్లు హమాస్‌ పేర్కొంది.

కొత్త కమిటీ గాజాలో పౌర సేవలు, పునర్నిర్మాణ పనులు, రోజువారీ పరిపాలనా వ్యవహారాలను పర్యవేక్షించనుంది. యుద్ధం కారణంగా తీవ్రంగా దెబ్బతిన్న మౌలిక వసతుల పునరుద్ధరణ, ప్రజలకు అవసరమైన సేవల పునరుద్ధరణపై ఈ కమిటీ ప్రధానంగా దృష్టి సారించనుందని సమాచారం.

హమాస్‌ ప్రతినిధి హాజెమ్‌ ఖాసిమ్‌ మాట్లాడుతూ.. గాజా వ్యవహారాల్లో ఇజ్రాయెల్‌ సైన్యం జోక్యం చేసుకునేందుకు ఎలాంటి కారణాలు మిగలకుండా చేయడానికే ఈ నిర్ణయం తీసుకున్నట్లు తెలిపారు. అంతర్జాతీయ సమాజం ఆమోదించే విధంగా పరిపాలన కొనసాగించేందుకు ఈ మార్పు ఉపయోగపడుతుందని పేర్కొన్నారు.

అయితే హమాస్‌ తన వద్ద ఉన్న ఆయుధాలను అంతర్జాతీయ దళానికి అప్పగించే అంశంపై ఎలాంటి స్పష్టత ఇవ్వలేదు. ఈ అంశం భవిష్యత్‌ శాంతి చర్చల్లో కీలకంగా మారే అవకాశం ఉందని అంతర్జాతీయ పరిశీలకులు భావిస్తున్నారు.

గాజాలో దీర్ఘకాలంగా కొనసాగుతున్న రాజకీయ, సైనిక ఆధిపత్యానికి ఈ నిర్ణయం ముగింపు పలుకుతుందా లేదా అనేది రాబోయే పరిణామాలపై ఆధారపడి ఉంటుంది. కొత్త పరిపాలనా వ్యవస్థ ఏర్పాటులో అంతర్జాతీయ సంస్థలు, ప్రాంతీయ దేశాల పాత్ర కీలకంగా మారనుంది.