కరూర్ వైశ్యా బ్యాంక్ వ్యాపార విస్తరణకు భారీ లక్ష్యాలను నిర్దేశించుకుంది. ప్రతి మూడేళ్లకు బ్యాంక్ వ్యాపారాన్ని మరో రూ.లక్ష కోట్ల మేర పెంచాలని యాజమాన్యం భావిస్తోంది. ప్రస్తుతం రూ.2.27 లక్షల కోట్లకు చేరిన మొత్తం వ్యాపారాన్ని మరింత వేగంగా విస్తరించేందుకు కొత్త శాఖల ఏర్పాటుతో పాటు డిజిటల్ సాంకేతికతను విస్తృతంగా వినియోగిస్తోంది.
దేశవ్యాప్తంగా ప్రస్తుతం 919 శాఖలు ఉన్నాయని బ్యాంక్ ఎండీ, సీఈఓ బి.రమేశ్బాబు తెలిపారు. వచ్చే ఏడాది వ్యవధిలో ఈ సంఖ్యను 1,000కు పెంచనున్నట్లు వెల్లడించారు. ఇందులో తెలుగు రాష్ట్రాలకు ప్రత్యేక ప్రాధాన్యం ఇస్తూ మరో 30 నుంచి 35 శాఖలను ఏర్పాటు చేయనున్నట్లు చెప్పారు. తెలంగాణలో 33 జిల్లాలకు గాను ప్రస్తుతం 24 జిల్లాల్లోనే బ్యాంక్ శాఖలు ఉన్నందున విస్తరణకు మరింత అవకాశం ఉందని వివరించారు.
తెలంగాణలో గచ్చిబౌలి, ఇంద్రేశం, కోకాపేటతో పాటు ఆంధ్రప్రదేశ్లో విజయవాడ రామవరప్పాడు, జగ్గయ్యపేట, సోంపేట, విశాఖపట్నం కంచరపాలెం, రాజమండ్రి కొంతమూరులో కొత్త శాఖలను ప్రారంభించినట్లు తెలిపారు. బ్యాంక్ లావాదేవీల్లో 98 శాతం డిజిటల్గా జరుగుతున్నప్పటికీ, ప్రత్యక్షంగా బ్యాంకింగ్ సేవలు పొందాలని కోరుకునే ఖాతాదారులకు శాఖలు అందుబాటులో ఉండటం అవసరమని పేర్కొన్నారు.
రుణాల విషయంలో అత్యంత అప్రమత్తంగా వ్యవహరిస్తున్నామని రమేశ్బాబు తెలిపారు. సిబిల్ స్కోర్తో పాటు 40-45 రకాల వనరుల నుంచి సమాచారాన్ని సేకరించి రుణగ్రహీతల సామర్థ్యాన్ని అంచనా వేస్తున్నట్లు చెప్పారు. కృత్రిమ మేధ, మెషీన్ లెర్నింగ్ సాంకేతికతలను కూడా రుణాల జారీ ప్రక్రియలో వినియోగిస్తున్నట్లు వెల్లడించారు. ఈ జాగ్రత్తల కారణంగానే ఏప్రిల్-జూన్ త్రైమాసికంలో నికర నిరర్థక ఆస్తులు 0.19 శాతానికి పరిమితమయ్యాయని తెలిపారు.
2026 జూన్ 30 నాటికి బ్యాంక్ మొత్తం వ్యాపారం రూ.2,27,267 కోట్లకు చేరింది. ఇందులో రూ.1,22,587 కోట్ల డిపాజిట్లు, రూ.1,04,680 కోట్ల రుణాలు ఉన్నాయి. గతంలో రూ.250 కోట్ల స్థాయిలో ఉన్న వార్షిక నికర లాభం ఇప్పుడు రూ.2,500 కోట్లను మించిందని రమేశ్బాబు వివరించారు.
బ్యాంక్పై పెద్ద మ్యూచువల్ఫండ్ సంస్థలకు విశ్వాసం పెరిగిందని ఆయన తెలిపారు. ఎస్బీఐ, ఐసీఐసీఐ, హెచ్డీఎఫ్సీ మ్యూచువల్ఫండ్ సంస్థలు ఒక్కొక్కటి 9.9 శాతం వరకు వాటాలు కొనుగోలు చేసేందుకు రిజర్వ్ బ్యాంక్ నుంచి అనుమతులు పొందినట్లు చెప్పారు. రిటర్న్ ఆన్ అసెట్స్ 2.11 శాతం, రిటర్న్ ఆన్ ఈక్విటీ కనీసం 15 శాతం ఉండటం బ్యాంక్ పనితీరుకు నిదర్శనమని పేర్కొన్నారు.
కార్పొరేట్ రుణాల వాటాను గణనీయంగా తగ్గించి, ఎంఎస్ఎంఈ, రిటెయిల్, వ్యవసాయ రంగాలకు రుణాలను పెంచుతున్నామని తెలిపారు. అంకుర సంస్థలకు ప్రత్యేక పరిస్థితులకు అనుగుణంగా రుణాలు అందించేందుకు బెంగళూరులో సంప్రదింపులు జరుగుతున్నాయని, భవిష్యత్తులో కొత్త పథకాలను తీసుకురానున్నట్లు వెల్లడించారు.
వ్యవసాయ రుణాల్లో బంగారు ఆభరణాల తనఖా రుణాలకు అధిక ప్రాధాన్యం ఉందని రమేశ్బాబు చెప్పారు. వ్యవసాయ రుణాల్లో సుమారు 90 శాతం బంగారంపై ఆధారపడి ఉన్నాయని తెలిపారు. బంగారం విలువలో 75 శాతానికి మించి రుణం ఇవ్వకుండా జాగ్రత్తలు తీసుకుంటున్నామని, మొత్తం రుణాల్లో పసిడి రుణాల వాటాను 30 శాతానికి మించకుండా నియంత్రిస్తున్నట్లు వివరించారు.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews Wellness WorldNews
