ఐపీఎల్‌పై మరోసారి సంచలన వ్యాఖ్యలు చేసిన లియామ్ లివింగ్‌స్టోన్

ఇంగ్లాండ్ క్రికెటర్ లియామ్ లివింగ్‌స్టోన్ ఐపీఎల్‌పై మరోసారి చేసిన వ్యాఖ్యలు క్రికెట్ వర్గాల్లో చర్చనీయాంశంగా మారాయి. రెండు రోజుల క్రితం “ఐపీఎల్‌లో నైపుణ్యం లేదు, బోర్‌గా ఉంది” అంటూ సంచలన వ్యాఖ్యలు చేసిన ఆయన, తాజాగా సన్‌రైజర్స్ హైదరాబాద్ ఫ్రాంచైజీ యాజమాన్యంపై పరోక్షంగా విమర్శలు చేశారు.

ఈ సీజన్‌లో తాను కేవలం రెండు మ్యాచ్‌ల్లో మాత్రమే ఆడినట్లు పేర్కొన్న లివింగ్‌స్టోన్, జట్టు తుది ఎంపికలో యాజమాన్యం ప్రభావం ఉందని వ్యాఖ్యానించారు. కేవలం ముగ్గురు విదేశీ ఆటగాళ్లతోనే కొన్ని మ్యాచ్‌లు ఆడినప్పటికీ తనకు అవకాశాలు తగ్గాయని ఆయన అసంతృప్తి వ్యక్తం చేశారు.

ఐపీఎల్‌లో మూడు రకాల పరిస్థితులు ఉంటాయని చెప్పిన లివింగ్‌స్టోన్, ఒకటి స్థిర స్థానం కలిగిన ఆటగాళ్లు, రెండోది అవకాశాలపై అనిశ్చితి ఉన్నవారు, మూడోది తక్కువ అవకాశాలు పొందేవారు అని వివరించారు. తన పరిస్థితి రెండో కోవలోకి వస్తుందని తెలిపారు.

సన్‌రైజర్స్‌కు చేరినప్పుడు వేలంలో ముంబయి ఇండియన్స్ కోరుకున్న ఆటగాడి కోసం జట్టు పోటీపడి, అధిక ధరకు అతడిని కొనుగోలు చేసిందని చెప్పారు. ఆ ఆటగాడు యాజమాన్యానికి బాగా నచ్చడంతో తుది జట్టులో స్థిర స్థానం పొందాడని అన్నారు.

ప్యాట్ కమిన్స్ కొన్ని మ్యాచ్‌లకు అందుబాటులో లేకపోయినా కూడా జట్టు కేవలం ముగ్గురు విదేశీ ఆటగాళ్లతోనే బరిలోకి దిగిందని లివింగ్‌స్టోన్ పేర్కొన్నారు. ఈ విషయంపై కోచ్ డానియల్ వెటోరీని అడిగినప్పుడు, యాజమాన్యానికి ఒక ఆటగాడు బాగా నచ్చడంతో అతడికి స్థానం కేటాయించాల్సి వచ్చిందని చెప్పినట్లు వెల్లడించారు.

తాను ఎక్కువ మ్యాచ్‌లు ఆడకపోవడానికి ఇదే కారణమని అర్థమైందని లివింగ్‌స్టోన్ తెలిపారు. అయితే నిర్ణయాల వెనుక అసలు కారణం ఏమిటో తనకు స్పష్టంగా తెలియదని ఆయన అన్నారు. ఈ సీజన్‌లో డానియల్ వెటోరీ తనతో పారదర్శకంగా వ్యవహరించాడని ప్రశంసించారు.