కాలుష్యానికి చెక్‌ పెట్టే లిక్విడ్‌ ట్రీ.. చెట్లలా ఆక్సిజన్‌ అందించే సరికొత్త సాంకేతికత

పెరుగుతున్న నగర కాలుష్యానికి పరిష్కారం చూపే దిశగా శాస్త్రవేత్తలు కొత్త సాంకేతికతలను అభివృద్ధి చేస్తున్నారు. ఈ క్రమంలో ధన్‌బాద్‌లోని సెంట్రల్‌ ఇన్‌స్టిట్యూట్‌ ఆఫ్‌ మైనింగ్‌ అండ్‌ ఫ్యూయల్‌ రీసెర్చ్‌ (సీఐఎమ్‌ఎఫ్‌ఆర్‌) పరిశోధకులు రూపొందించిన మొబైల్‌ లిక్విడ్‌ ట్రీ‌ ప్రత్యేక ఆకర్షణగా నిలుస్తోంది.

సాధారణ చెట్లు చేసే పనినే ఈ లిక్విడ్‌ ట్రీ కూడా చేస్తుందని శాస్త్రవేత్తలు తెలిపారు. గాలిలోని కార్బన్‌ డైఆక్సైడ్‌ను గ్రహించి, ఆక్సిజన్‌ను విడుదల చేయడంతో పాటు వాతావరణంలోని దుమ్ము, సూక్ష్మ కాలుష్య కణాలను తగ్గించడంలో ఇది సహాయపడుతుందని పేర్కొన్నారు.

ఈ పరికరం ఒక ఫొటోబయోరియాక్టర్‌ సాంకేతికత ఆధారంగా పనిచేస్తుంది. ట్యాంక్‌ ఆకారంలోని ప్రత్యేక వ్యవస్థలో నీరు, మైక్రోఆల్గేలను నింపి వాటి ద్వారా కిరణజన్యసంయోగ క్రియను నిర్వహిస్తారు. ఈ ప్రక్రియలో మైక్రోఆల్గే కార్బన్‌ డైఆక్సైడ్‌ను గ్రహించి ఆక్సిజన్‌ను ఉత్పత్తి చేస్తుంది.

రద్దీగా ఉండే నగర ప్రాంతాల్లో పెద్ద సంఖ్యలో చెట్లు నాటేందుకు స్థలం అందుబాటులో లేకపోయినా, ఈ మొబైల్‌ లిక్విడ్‌ ట్రీలను ఏర్పాటు చేయవచ్చని పరిశోధకులు చెబుతున్నారు. రహదారులు, పారిశ్రామిక ప్రాంతాలు, కార్యాలయ సముదాయాలు, ప్రజలు ఎక్కువగా ఉండే ప్రదేశాల్లో వీటిని వినియోగించే అవకాశం ఉందని తెలిపారు.

ఈ వ్యవస్థకు సహజ కాంతితో పాటు కృత్రిమ కాంతిని కూడా ఉపయోగించవచ్చని, అందువల్ల ఇది 24 గంటల పాటు పనిచేసేలా రూపొందించామని శాస్త్రవేత్తలు వివరించారు. సాధారణ చెట్లకు ఎక్కువ సమయం, స్థలం అవసరమవుతుండగా.. లిక్విడ్‌ ట్రీ తక్కువ స్థలంలోనే గాలి శుద్ధి చేసే సామర్థ్యాన్ని కలిగి ఉంటుందని పేర్కొన్నారు.

ప్రస్తుతం ప్రపంచవ్యాప్తంగా వాయు కాలుష్యం ప్రధాన సమస్యగా మారుతున్న నేపథ్యంలో ఇలాంటి గ్రీన్‌ టెక్నాలజీలకు ప్రాధాన్యం పెరుగుతోంది. భవిష్యత్‌లో స్మార్ట్‌ సిటీలలో గాలి నాణ్యతను మెరుగుపరిచేందుకు లిక్విడ్‌ ట్రీ వంటి పర్యావరణ అనుకూల పరిష్కారాలు కీలక పాత్ర పోషించే అవకాశం ఉందని నిపుణులు అభిప్రాయపడుతున్నారు.