ముకుల్ చౌదరి విధ్వంసం… కోల్‌కతాపై లఖ్‌నవూ విజయం

ఐపీఎల్‌లో కోల్‌కతా నైట్‌రైడర్స్, లఖ్‌నవూ సూపర్ జెయింట్స్ మధ్య జరిగిన మ్యాచ్‌లో యువ ఆటగాడు ముకుల్ చౌదరి మెరుపు ఇన్నింగ్స్‌తో అందరి దృష్టిని ఆకర్షించాడు. లఖ్‌నవూ ఇన్నింగ్స్ 17వ ఓవర్‌లో పేసర్ వైభవ్ ఆరోరా వేసిన యార్కర్‌ను హెలికాప్టర్ షాట్‌గా సిక్స్‌గా మలిచిన ముకుల్, ఈడెన్ గార్డెన్స్‌లో అభిమానులను ఆశ్చర్యంలో ముంచెత్తాడు.27 బంతుల్లో 54 పరుగులు చేసి అజేయంగా నిలిచిన ముకుల్ చౌదరి, తన దూకుడైన బ్యాటింగ్‌తో లఖ్‌నవూ విజయానికి కీలకంగా మారాడు. మహేంద్రసింగ్ ధోని ఆటశైలిని గుర్తు చేసేలా అతడు ప్రదర్శన ఇవ్వడంతో సోషల్ మీడియాలో పెద్ద ఎత్తున చర్చ సాగుతోంది.

రాజస్థాన్‌కు చెందిన ముకుల్ చౌదరి మధ్యతరగతి కుటుంబం నుంచి వచ్చిన ఆటగాడు. క్రికెట్‌పై ఉన్న ఆసక్తితో అతని తండ్రి దలీప్ అనేక కష్టాలు ఎదుర్కొని కుమారుడిని క్రికెట్ వైపు ప్రోత్సహించారు. ఆర్థిక ఇబ్బందులు ఉన్నప్పటికీ తన కుమారుడిని క్రికెటర్‌గా తీర్చిదిద్దేందుకు కుటుంబం ఎంతో త్యాగం చేసింది.చిన్ననాటి నుంచి జైపూర్‌లోని ఆరవల్లి కోచింగ్ సెంటర్‌లో శిక్షణ పొందిన ముకుల్, మొదట బౌలర్‌గా ప్రారంభించి తర్వాత వికెట్ కీపర్-బ్యాటర్‌గా మారాడు. కోచ్ సూచనలతో బ్యాటింగ్‌పై ఎక్కువ దృష్టి పెట్టి పవర్ హిట్టింగ్‌లో ప్రత్యేకత సాధించాడు.

దేశవాళీ క్రికెట్‌లో 2023లో అరంగేట్రం చేసిన ముకుల్‌కు ప్రారంభంలో పెద్దగా అవకాశాలు రాలేదు. అయితే ముస్తాక్ అలీ ట్రోఫీలో దిల్లీపై ఆడిన మెరుపు ఇన్నింగ్స్‌తో ఐపీఎల్ ఫ్రాంచైజీల దృష్టిలో పడ్డాడు. ఆ తర్వాత 2025 వేలంలో లఖ్‌నవూ సూపర్ జెయింట్స్ అతడిని రూ.2.60 కోట్లకు కొనుగోలు చేసింది.మ్యాచ్ అనంతరం ముకుల్ మాట్లాడుతూ, ధోని తనకు స్ఫూర్తి అని, అతని లాగే ఫినిషర్‌గా ఎదగాలనేది తన లక్ష్యమని తెలిపాడు. ఒత్తిడిని నియంత్రించేందుకు ధ్యానం, శ్వాస నియంత్రణ పద్ధతులు ఉపయోగిస్తానని వెల్లడించాడు.