నెలరోజుల్లోపే ఓటీటీలోకి ‘పళ్లబురుసు’.. సైలెంట్‌గా స్ట్రీమింగ్‌

సుధాకర్‌ రెడ్డి, మురళీధర్‌ గౌడ్‌ ప్రధాన పాత్రల్లో నటించిన చిత్రం ‘పళ్లబురుసు’. ఉదయ్‌ చౌహాన్‌ దర్శకత్వం వహించిన ఈ సినిమా తెలంగాణ గ్రామీణ నేపథ్యంలో తెరకెక్కింది. ఇటీవల థియేటర్లలో విడుదలైన ఈ చిత్రానికి మిశ్రమ స్పందన లభించింది. తాజాగా ఎలాంటి ముందస్తు హంగామా లేకుండా ఓటీటీ ప్రేక్షకులను పలకరించింది. అమెజాన్‌ ప్రైమ్‌ వీడియో వేదికగా ఈ సినిమా స్ట్రీమింగ్‌ అవుతోంది. థియేటర్లలో విడుదలైన నెలరోజుల్లోపే డిజిటల్‌ వేదికపైకి రావడం విశేషం.

తెలంగాణలోని ఓ పల్లెటూరిలో శంభు (సుధాకర్‌ రెడ్డి) అనే ఒంటరి వృద్ధుడు జీవిస్తుంటాడు. ఒకరోజు పంటినొప్పి తీవ్రం కావడంతో ఆస్పత్రికి వెళ్తాడు. వైద్యురాలు అతడిని పరీక్షించి చికిత్స చేయడంతో పాటు కొన్ని మందులు సూచిస్తుంది. ఇకపై పళ్ల సమస్యలు రాకుండా వేపపుల్లకు బదులుగా టూత్‌ బ్రష్‌ ఉపయోగించాలని చెబుతుంది.

దీంతో శంభు తనకు ఓ టూత్‌ బ్రష్‌ కొనివ్వాలని కొడుకు తిరుపతి (మురళీధర్‌ గౌడ్‌)ను అడుగుతాడు. అయితే తిరుపతి తన వ్యక్తిగత సమస్యల్లో చిక్కుకుని తండ్రి మాటను పెద్దగా పట్టించుకోడు. దీంతో శంభు తీవ్రంగా ఆగ్రహిస్తాడు.

ఇదే సమయంలో మరో విషయం అతడిని మరింత బాధిస్తుంది. తనకు చెప్పకుండానే కొడుకు తిరుపతి తన మనవరాలి పెళ్లి జరిపించడంతో శంభు అవమానంగా భావిస్తాడు. తండ్రి, కొడుకుల మధ్య ఉన్న మనస్పర్థలు మరింత ముదురుతాయి.

కొడుకు తన మాట వినలేదన్న కోపంతో శంభు పోలీస్‌ స్టేషన్‌ మెట్లు ఎక్కుతాడు. పళ్ల బురుసు కొనివ్వలేదనే విషయాన్ని సాకుగా చేసుకుని కొడుకుపై ఫిర్యాదు చేయాలని నిర్ణయించుకుంటాడు. అయితే ఈ చిన్న వివాదం అక్కడితో ఆగదు. క్రమంగా అది పెద్ద సమస్యగా మారి జిల్లా కోర్టు వరకు వెళ్తుంది.

ఒక సాధారణ టూత్‌ బ్రష్‌ చుట్టూ మొదలైన తండ్రీకొడుకుల వివాదం చివరకు ఎలాంటి మలుపులు తిరిగింది? శంభు తన కొడుకుపై చేసిన ఫిర్యాదు ఏమైంది? తండ్రీకొడుకుల మధ్య దూరం తగ్గిందా? అనేది సినిమాలో చూడాల్సిందే.

తెలంగాణ పల్లె జీవనం, కుటుంబ సంబంధాలు, వృద్ధుల మనస్తత్వం, తండ్రీకొడుకుల మధ్య వచ్చే అభిప్రాయ భేదాలను హాస్యంతో మేళవిస్తూ ‘పళ్లబురుసు’ను రూపొందించారు. సుధాకర్‌ రెడ్డి, మురళీధర్‌ గౌడ్‌ తమ పాత్రలకు తగ్గట్లుగా నటించారు. థియేటర్లలో మిశ్రమ స్పందన అందుకున్న ఈ సినిమా ఇప్పుడు ఓటీటీ ప్రేక్షకులను అలరించేందుకు సిద్ధమైంది.