పవన్‌ కల్యాణ్‌ చొరవతో హస్తకళాకారులకు ఆరోగ్య భరోసా.. క్లస్టర్ల వారీ వైద్య శిబిరాలు

హస్తకళాకారుల సంక్షేమానికి ప్రాధాన్యం ఇస్తూ ఉప ముఖ్యమంత్రి పవన్‌ కల్యాణ్‌ చొరవతో రాష్ట్రంలో క్లస్టర్ల వారీగా వైద్య శిబిరాలు ప్రారంభమయ్యాయి. ఎన్నో ఏళ్లుగా సంప్రదాయ కళలను కొనసాగిస్తున్న లేస్‌, కలంకారీ వంటి హస్తకళల కళాకారులకు ఆరోగ్య పరంగా అండగా నిలిచేందుకు ఈ కార్యక్రమాన్ని చేపట్టారు.

ఇందులో భాగంగా నరసాపురం లేస్‌ కళాకారులు, శ్రీకాళహస్తి కలంకారీ కళాకారుల కోసం బుధవారం ప్రత్యేక వైద్య శిబిరాలు నిర్వహించారు. నరసాపురంలో నిర్వహించిన శిబిరానికి 105 మంది కళాకారులు హాజరై వైద్య పరీక్షలు చేయించుకున్నారు. పరీక్షల్లో 37 మందికి కంటి సంబంధిత సమస్యలు ఉన్నట్లు వైద్యులు గుర్తించారు. వీరిలో 16 మందికి శుక్లాలు ఉన్నట్లు నిర్ధారణ కావడంతో వారికి అవసరమైన చికిత్సను వైద్యారోగ్య శాఖ సహకారంతో అందించేందుకు చర్యలు తీసుకుంటున్నారు.

అలాగే శ్రీకాళహస్తిలో నిర్వహించిన వైద్య శిబిరంలో 53 మంది కలంకారీ కళాకారులకు వైద్య పరీక్షలు చేశారు. కళాకారుల ఆరోగ్య పరిస్థితులను పరిశీలించి, వారికి అవసరమైన వైద్య సలహాలు, చికిత్సా సూచనలు అందించారు.

ఇటీవల విజయవాడలో నిర్వహించిన హస్తకళా మహోత్సవంలో నరసాపురానికి చెందిన లేస్‌ కళాకారిణి మహాలక్ష్మి తనకు కంటి సమస్య ఉందని ఉప ముఖ్యమంత్రి పవన్‌ కల్యాణ్‌ దృష్టికి తీసుకెళ్లారు. దీనిపై వెంటనే స్పందించిన పవన్‌ కల్యాణ్‌ ఆమెకు వైద్య సహాయం అందించేలా చర్యలు తీసుకున్నారు.

మహాలక్ష్మితో పాటు మరో లేస్‌ కళాకారిణి అందే లక్ష్మిని ప్రత్యేక వాహనంలో గుంటూరు జిల్లా పెదకాకానిలోని శంకర్‌ ఆసుపత్రికి పంపించి కంటి పరీక్షలు చేయించారు. కళాకారుల ఆరోగ్య సమస్యలను గుర్తించి వారికి మెరుగైన వైద్యం అందించేందుకు ప్రభుత్వం అండగా ఉంటుందని ఈ సందర్భంగా అధికారులు తెలిపారు.

హస్తకళలు రాష్ట్ర సాంస్కృతిక వారసత్వంలో కీలక భాగమని, ఈ రంగంపై ఆధారపడిన కళాకారుల సంక్షేమం కోసం మరిన్ని కార్యక్రమాలు చేపట్టనున్నట్లు తెలిపారు. ఆరోగ్య సమస్యల కారణంగా కళాకారుల జీవనోపాధికి ఇబ్బందులు కలగకుండా వైద్య శిబిరాలు, చికిత్సా సదుపాయాలను కొనసాగించాలని నిర్ణయించారు.

కళాకారులకు వైద్య సేవలు అందించడంతో పాటు వారి కుటుంబాల ఆరోగ్య పరిస్థితులపై కూడా దృష్టి సారించేలా భవిష్యత్‌లో మరిన్ని ఆరోగ్య శిబిరాలను నిర్వహించే అవకాశం ఉంది.