ఆంధ్రప్రదేశ్‌లో రాయల్ ఎన్‌ఫీల్డ్ రెండో తయారీ కేంద్రం

ఆంధ్రప్రదేశ్‌ రాష్ట్రం త్వరలో ప్రఖ్యాత మోటార్‌సైకిల్ తయారీ సంస్థ Royal Enfield కు దేశంలో రెండో తయారీ కేంద్రంగా మారనుంది. తిరుపతి జిల్లా సత్యవేడు మండలం రాళ్లకుప్పం వద్ద సుమారు 267 ఎకరాల విస్తీర్ణంలో ఈ భారీ తయారీ యూనిట్‌ను ఏర్పాటు చేయనున్నారు.

రెండు దశల్లో అమలు చేయనున్న ఈ ప్రాజెక్టుకు కంపెనీ మొత్తం రూ.2,508 కోట్ల భారీ పెట్టుబడి పెట్టనుంది. ఈ ప్రాజెక్ట్ ద్వారా సుమారు 3,000 మందికి ప్రత్యక్ష ఉపాధి అవకాశాలు లభిస్తాయని ప్రతిపాదనల్లో పేర్కొన్నారు. ప్రస్తుతం ఈ సంస్థకు ప్రధాన తయారీ యూనిట్లు తమిళనాడులోనే ఉన్నాయి.

అంతర్జాతీయంగా గుర్తింపు పొందిన Royal Enfield ఇప్పటివరకు దేశంలో 10 లక్షలకు పైగా మోటార్‌సైకిళ్లను విక్రయించింది. 250 సీసీ నుంచి 750 సీసీ విభాగంలో 88% మార్కెట్ వాటాను కలిగి ఉండటం ఈ సంస్థ ప్రత్యేకతగా నిలుస్తోంది.

ఈ కొత్త యూనిట్ ద్వారా ఆంధ్రప్రదేశ్ నుంచి మోటార్‌సైకిళ్ల ఎగుమతులకు కూడా మార్గం సుగమం కానుంది. అలాగే అనుబంధ పరిశ్రమల ఏర్పాటుతో రాష్ట్రానికి మరిన్ని పెట్టుబడులు వచ్చే అవకాశం ఉందని ప్రభుత్వం భావిస్తోంది.

మొదటి దశలో రూ.1,249 కోట్ల పెట్టుబడితో తయారీ ప్లాంట్, ప్రొడక్షన్ డెవలప్‌మెంట్ యూనిట్లు, వెండర్ పార్క్ ఏర్పాటు చేయనున్నారు. పనులు 2026-27లో ప్రారంభించి 2028-29 నాటికి పూర్తి చేయాలని లక్ష్యంగా పెట్టుకున్నారు.

రెండో దశలో మరో రూ.1,259 కోట్ల పెట్టుబడితో పూర్తి స్థాయి తయారీ విస్తరణ చేపట్టనున్నారు. ఈ దశ పనులు 2029-30లో ప్రారంభించి 2031-32 నాటికి పూర్తి చేయాలని ప్రతిపాదించారు.

ప్రస్తుతం Royal Enfield కార్యకలాపాలు ప్రధానంగా తమిళనాడులో కొనసాగుతున్నాయి. అక్కడ నాలుగు తయారీ యూనిట్లు ఉన్నాయి. అలాగే నార్త్ అమెరికా, కెనడా, బ్రిటన్, బ్రెజిల్, థాయ్‌లాండ్ వంటి దేశాల్లో అనుబంధ యూనిట్లు కూడా ఉన్నాయి. యూకేలోని బ్రంటింగ్‌థోర్ప్ మరియు చెన్నైలో రెండు పరిశోధన కేంద్రాలను కూడా సంస్థ నిర్వహిస్తోంది.