ఫౌజీ’ ఫస్ట్ సాంగ్‌కు రంగం సిద్ధం

పాన్ ఇండియా స్టార్ ప్రభాస్, దర్శకుడు హను రాఘవపూడి కలయికలో తెరకెక్కుతున్న ‘ఫౌజీ’ సినిమాపై అంచనాలు రోజురోజుకూ పెరుగుతున్నాయి. టీ సిరీస్ సమర్పణలో మైత్రీ మూవీ మేకర్స్ నిర్మిస్తున్న ఈ చిత్రంలో ఇమాన్వి కథానాయికగా నటిస్తుండగా, మిథున్ చక్రవర్తి, అనుపమ్ ఖేర్ వంటి ప్రముఖులు కీలక పాత్రలు పోషిస్తున్నారు.

ప్రస్తుతం ఈ సినిమా షూటింగ్ తుదిదశలో ఉండగా, ఇప్పటికే 75 శాతం చిత్రీకరణ పూర్తయినట్లు తెలుస్తోంది. మిగిలిన యాక్షన్ సన్నివేశాలు, కీలక ఘట్టాల చిత్రీకరణను వేగంగా పూర్తి చేయడానికి చిత్ర బృందం ప్రయత్నిస్తోంది. ఈ నేపథ్యంలో అభిమానులకు మరో గుడ్ న్యూస్ వినిపిస్తోంది.

ఈ చిత్రంలోని తొలి పాటను విడుదల చేసేందుకు మేకర్స్ సన్నాహాలు చేస్తున్నట్లు సమాచారం. ఇప్పటికే లిరికల్ సాంగ్‌కు సంబంధించిన పనులు ప్రారంభమయ్యాయని, ఈ నెలలోనే ఈ పాట ప్రేక్షకుల ముందుకు వచ్చే అవకాశముందని టాక్. దీనిపై త్వరలోనే అధికారిక ప్రకటన వెలువడనుంది.

సంగీత దర్శకుడు విశాల్ చంద్రశేఖర్ అందిస్తున్న మ్యూజిక్ ఈ సినిమాకు ప్రత్యేక ఆకర్షణగా నిలవనుంది. ఇప్పటికే ఆయన అందించిన ట్యూన్స్‌పై టీమ్ పూర్తి నమ్మకంతో ఉన్నట్లు తెలుస్తోంది. మరోవైపు సుదీప్ ఛటర్జీ సినిమాటోగ్రఫీ కూడా సినిమాకు విజువల్ గ్రాండ్యూర్ తీసుకురానుంది.

యాక్షన్, భావోద్వేగాలు, దేశభక్తి అంశాల మేళవింపుతో రూపొందుతున్న ‘ఫౌజీ’ చిత్రం ఈ ఏడాది చివర్లో థియేటర్లలో విడుదల కావడానికి సిద్ధమవుతోంది. ప్రభాస్ ఫ్యాన్స్‌తో పాటు సినీ ప్రేమికులు కూడా ఈ సినిమాను ఆసక్తిగా ఎదురుచూస్తున్నారు.