సుప్రీంకోర్టులో హైడ్రామా.. న్యాయమూర్తులపై కక్షిదారు దురుసు ప్రవర్తన

సుప్రీంకోర్టులో శుక్రవారం అనూహ్య పరిణామం చోటుచేసుకుంది. తన కేసును తానే వాదించుకునేందుకు వచ్చిన ఓ కక్షిదారు కోర్టు నిబంధనలకు విరుద్ధంగా ప్రవర్తించడంతో కొద్దిసేపు ఉద్రిక్త వాతావరణం నెలకొంది. న్యాయమూర్తులతో వాగ్వాదానికి దిగడమే కాకుండా, తన చేతిలో ఉన్న పత్రాలను విసిరేయడంతో భద్రతా సిబ్బంది జోక్యం చేసుకోవాల్సి వచ్చింది.

జస్టిస్‌ కె.వి. విశ్వనాథన్‌, జస్టిస్‌ ఆలోక్‌ అరాధేలతో కూడిన ధర్మాసనం ఎదుట ఈ ఘటన జరిగింది. ఉత్తర్‌ప్రదేశ్‌కు చెందిన ప్రబల్‌ ప్రతాప్‌ తన కేసులో స్వయంగా వాదనలు వినిపిస్తూ దూకుడుగా వ్యవహరించినట్లు సమాచారం. విచారణ సమయంలో న్యాయస్థానం పరిధిని దాటి ఆదేశాలు జారీ చేసేలా వ్యాఖ్యలు చేయడంతో ధర్మాసనం ఆశ్చర్యం వ్యక్తం చేసింది.

లఖ్‌నవూ అసిస్టెంట్‌ పోలీస్‌ కమిషనర్‌పై ఎఫ్‌ఐఆర్‌ నమోదు చేయాలని తానే ఆదేశిస్తున్నానంటూ ప్రతాప్‌ వ్యాఖ్యానించడంతో జస్టిస్‌ విశ్వనాథన్‌ స్పందిస్తూ.. న్యాయమూర్తులను ఆదేశించే విధంగా మాట్లాడటం సరైన పద్ధతి కాదని సూచించారు. అయితే ఆయన తన వైఖరిని మార్చుకోకుండా వాదనలు కొనసాగిస్తూ, కోర్టు దస్త్రాలను విసిరినట్లు తెలుస్తోంది.

దీంతో వెంటనే అప్రమత్తమైన భద్రతా సిబ్బంది అతడిని కోర్టు హాల్‌ నుంచి బయటకు తీసుకెళ్లారు. ఘటన అనంతరం ధర్మాసనం ఈ వ్యవహారంపై ఉత్తర్వులు జారీ చేసింది. కక్షిదారు పరిస్థితిని పరిగణనలోకి తీసుకుని అతనిపై ఎలాంటి కఠిన చర్యలు తీసుకోకూడదని నిర్ణయించినట్లు పేర్కొంది.

అలహాబాద్‌ హైకోర్టు ఇచ్చిన తీర్పును సవాల్‌ చేస్తూ ప్రబల్‌ ప్రతాప్‌ సుప్రీంకోర్టును ఆశ్రయించాడు. కేసు వివరాలను పరిశీలించిన ధర్మాసనం, ఈ విషయంలో జోక్యం చేసుకోవాల్సిన అవసరం లేదని స్పష్టం చేసింది. దీంతో అతని పిటిషన్‌ను కొట్టివేసింది.

న్యాయస్థానాల్లో కక్షిదారులు తమ వాదనలు వినిపించే హక్కు ఉన్నప్పటికీ, కోర్టు గౌరవం, న్యాయ ప్రక్రియకు అనుగుణంగా వ్యవహరించాల్సిన అవసరం ఉందని న్యాయ నిపుణులు పేర్కొంటున్నారు. సుప్రీంకోర్టులో జరిగిన ఈ ఘటన న్యాయ వర్గాల్లో చర్చనీయాంశంగా మారింది.