ట్రంప్‌ మదిలో మోదీకి ప్రత్యేక స్థానం: సెర్గియో గోర్‌

భారత్‌, అమెరికాల మధ్య రక్షణ, వాణిజ్య, దౌత్య సంబంధాలు బలంగా ఉన్నాయని అమెరికా రాయబారి సెర్గియో గోర్‌ తెలిపారు. ఇరు దేశాల మధ్య ద్వైపాక్షిక సంబంధాలను మరింత ముందుకు తీసుకెళ్లేందుకు నిరంతరం కృషి జరుగుతోందన్నారు. వచ్చే డిసెంబరులో అమెరికాలోని ఫ్లోరిడా రాష్ట్రం మయామీలో జరగనున్న జీ20 సదస్సుపైనా ఆయన కీలక వ్యాఖ్యలు చేశారు.

జీ20 సదస్సులో పాల్గొనే ప్రపంచ దేశాల నేతల్లో ప్రధాని నరేంద్రమోదీతో భేటీ కావడానికి అమెరికా అధ్యక్షుడు డొనాల్డ్‌ ట్రంప్‌ ప్రత్యేక ఆసక్తి చూపుతున్నారని గోర్‌ పేర్కొన్నారు. సదస్సుకు సుమారు 35 మంది దేశాధినేతలు హాజరుకానున్నారని, వారిలో ఎవరిని కలవాలని ట్రంప్‌ను అడిగితే మోదీ పేరును ప్రముఖంగా ప్రస్తావిస్తారని చెప్పారు.

ట్రంప్‌ ప్రధాని మోదీని తన వ్యక్తిగత మిత్రుడిగా భావిస్తారని గోర్‌ తెలిపారు. జీ20 సదస్సుకు మోదీ హాజరవుతారని తాను ఆశిస్తున్నానన్నారు. ఇరు దేశాల మధ్య ఉన్న స్నేహపూర్వక సంబంధాలకు మోదీ-ట్రంప్‌ వ్యక్తిగత అనుబంధం కూడా బలాన్ని చేకూరుస్తోందని పేర్కొన్నారు. అంతేకాకుండా వచ్చే ఏడాది ట్రంప్‌ భారత్‌ను సందర్శించే అవకాశం ఉందని వెల్లడించారు.

భారత్‌, అమెరికాల మధ్య వాణిజ్య ఒప్పందం కూడా తుది దశకు చేరుకుందని గోర్‌ తెలిపారు. అమెరికా సుప్రీంకోర్టు తీర్పు నేపథ్యంలో ఒప్పందంలోని కొన్ని అంశాలను తిరిగి పరిశీలిస్తున్నప్పటికీ, చర్చలు సానుకూలంగా కొనసాగుతున్నాయని చెప్పారు. రానున్న కొన్ని నెలల్లో వాణిజ్య ఒప్పందం ఖరారయ్యే అవకాశం ఉందని ఆశాభావం వ్యక్తం చేశారు.

ప్రధాని నరేంద్రమోదీ నాయకత్వాన్ని సెర్గియో గోర్‌ ప్రశంసించారు. మోదీ భారత్‌కు సుస్థిరమైన పాలన అందిస్తున్నారని పేర్కొన్నారు. ఆయన నాయకత్వంలో భారత్‌ అంతర్జాతీయంగా కీలక పాత్ర పోషిస్తోందని అన్నారు. భారత్‌, అమెరికాల మధ్య రక్షణ, ఆర్థిక, వాణిజ్య, దౌత్య రంగాల్లో సహకారం భవిష్యత్తులో మరింత విస్తరించే అవకాశం ఉందని గోర్‌ వ్యాఖ్యలను బట్టి స్పష్టమవుతోంది.