వేధింపులు తట్టుకోలేక భర్తను హతమార్చిన భార్య

పెద్దపల్లి జిల్లా సుల్తానాబాద్ మండలం కాశిపల్లి గ్రామంలో చోటుచేసుకున్న హత్య ఘటన కలకలం రేపింది. కుటుంబ కలహాలు, వేధింపుల నేపథ్యంలో భార్య చేతిలో భర్త ప్రాణాలు కోల్పోయిన ఘటన స్థానికంగా చర్చనీయాంశంగా మారింది.

పోలీసుల వివరాల ప్రకారం.. కాశిపల్లి గ్రామానికి చెందిన సయ్యద్ గోరేమియా, అతని భార్య గోరీబీ మధ్య గత ఏడాది కాలంగా తరచూ గొడవలు జరుగుతున్నాయి. ఈ క్రమంలో మనస్తాపానికి గురైన గోరేమియా కొంతకాలంగా జగిత్యాలలో ఉంటున్నాడు. రెండు రోజుల క్రితం తిరిగి స్వగ్రామానికి వచ్చాడు.

గురువారం రాత్రి మద్యం సేవించి ఇంటికి వచ్చిన గోరేమియా భార్యతో గొడవకు దిగినట్లు పోలీసులు తెలిపారు. మాటామాటా పెరగడంతో తీవ్ర ఆగ్రహానికి గురైన గోరీబీ ఇంట్లో ఉన్న మట్టిపెళ్లలతో భర్తపై దాడి చేసింది. ఈ దాడిలో తీవ్రంగా గాయపడిన గోరేమియా అక్కడికక్కడే మృతి చెందాడు.

ఘటనపై సమాచారం అందుకున్న సుల్తానాబాద్ పోలీసులు వెంటనే కాశిపల్లి గ్రామానికి చేరుకుని పరిస్థితిని పరిశీలించారు. మృతదేహాన్ని స్వాధీనం చేసుకుని పోస్టుమార్టం నిమిత్తం సుల్తానాబాద్ ప్రభుత్వాసుపత్రికి తరలించారు.

ఈ ఘటనకు సంబంధించి మృతుడి భార్య గోరీబీతో పాటు కుమారుడు సయ్యద్ అలీని పోలీసులు అదుపులోకి తీసుకుని విచారణ చేపట్టారు. కుటుంబ సభ్యులు, స్థానికుల నుంచి వివరాలు సేకరిస్తున్నారు. కేసు నమోదు చేసి అన్ని కోణాల్లో దర్యాప్తు చేస్తున్నట్లు పోలీసులు వెల్లడించారు.

కుటుంబ వివాదాలు తీవ్ర రూపం దాల్చడంతోనే ఈ ఘటన జరిగినట్లు ప్రాథమికంగా భావిస్తున్న పోలీసులు, పూర్తి వివరాలు దర్యాప్తు అనంతరం వెల్లడిస్తామని తెలిపారు.