యానాం గోదావరిలో చేపల మృత్యువాత.. నీటి మార్పులపై నిపుణుల అంచనా

యానాంలోని గౌతమి గోదావరి నదీ తీరంలో శుక్రవారం భారీ సంఖ్యలో కానాగంత జాతి చేపలు మృత్యువాత పడటం కలకలం రేపింది. నది ఒడ్డున పెద్ద ఎత్తున చనిపోయిన చేపలు కనిపించడంతో స్థానికులు, మత్స్యకారులు ఘటనపై ఆందోళన వ్యక్తం చేశారు.

చనిపోయిన చేపలను కొందరు మత్స్యకారులు పడవల్లోకి ఎత్తుకుని తరలించారు. వీటిని చేపల చెరువుల్లో ఇతర చేపలకు ఆహారంగా వినియోగించేందుకు తీసుకెళ్లినట్లు సమాచారం. అయితే, చనిపోయిన చేపలను వినియోగించే విషయంలో మత్స్యకారులు జాగ్రత్తలు పాటించాలని నిపుణులు సూచిస్తున్నారు.

కానాగంత చేపలు సాధారణంగా సముద్ర ప్రాంతాల నుంచి నదీ ముఖద్వార ప్రాంతాలకు చేరుకుని, ఉప్పు నీరు–తాజా నీరు కలిసే బ్రాకిష్‌ వాటర్‌ ప్రాంతాల్లో జీవిస్తాయని కాకినాడ పీఆర్‌ కళాశాల జువాలజీ విభాగాధిపతి బొల్లోజు అహ్మద్‌ అలీబాబా తెలిపారు. గౌతమి గోదావరిలోని నీటి లవణీయతలో ఆకస్మిక మార్పులు చోటుచేసుకోవడం వల్ల చేపలు మృతి చెంది ఉండవచ్చని ఆయన అభిప్రాయపడ్డారు.

ఇటీవల గోదావరిలోకి పెద్ద మొత్తంలో కొత్త నీరు చేరడం వల్ల నదీ నీటి స్వభావంలో మార్పులు వచ్చాయని నిపుణులు అంచనా వేస్తున్నారు. ధవళేశ్వరం బ్యారేజీ నుంచి గురువారం రాత్రి సుమారు లక్ష క్యూసెక్కుల వరద నీటిని సముద్రంలోకి విడుదల చేశారు. ఈ వరద నీరు సముద్రంలో కలిసే సమయంలో ఉప్పునీటి శాతం తగ్గడం, నీటి పరిస్థితుల్లో మార్పులు రావడం వల్ల చేపలపై ప్రభావం పడే అవకాశం ఉందని చెబుతున్నారు.

యానాం మత్స్యశాఖ అసిస్టెంట్‌ డైరెక్టర్‌ దడాల గొంతెయ్య మాట్లాడుతూ.. గోదావరి నుంచి కొత్త నీరు సముద్రంలో కలిసే సమయంలో గతంలో కూడా ఇలాంటి ఘటనలు చోటుచేసుకున్నాయని తెలిపారు. ప్రతి ఏడాది వర్షాకాలంలో నదీ ప్రవాహాలు పెరిగినప్పుడు కొన్ని రకాల చేపలు నీటి మార్పులను తట్టుకోలేక మృతి చెందే అవకాశం ఉంటుందని పేర్కొన్నారు.

ప్రస్తుతం చేపల మృతికి ఖచ్చితమైన కారణాలను గుర్తించేందుకు అధికారులు పరిస్థితిని పరిశీలిస్తున్నారు. నీటి నమూనాలను సేకరించి పరీక్షలు నిర్వహించే అవకాశం ఉంది. చేపల మృతిపై మత్స్యశాఖ అధికారులు కూడా వివరాలు సేకరిస్తున్నారు.

గోదావరి నదీ పరివాహక ప్రాంతాల్లో భారీ వర్షాలు, వరద ప్రవాహాల సమయంలో నీటి నాణ్యత, లవణీయతలో మార్పులు సహజంగా జరుగుతాయని నిపుణులు చెబుతున్నారు. అయితే ఇలాంటి ఘటనలు పునరావృతం కాకుండా నదీ పర్యావరణంపై నిరంతర పర్యవేక్షణ అవసరమని సూచిస్తున్నారు.