పోలింగ్ కేంద్రంలో ఓటు హక్కు వినియోగించిన రేవంత్ రెడ్డి

తెలంగాణలో జరుగుతున్న మున్సిపల్ ఎన్నికల పోలింగ్ సందర్భంగా ముఖ్యమంత్రి రేవంత్ రెడ్డి తన ఓటు హక్కును వినియోగించారు. వికారాబాద్ జిల్లా కొడంగల్‌లోని జడ్పీ హైస్కూల్ పోలింగ్ కేంద్రానికి చేరుకున్న సీఎం సాధారణ ఓటరిలా క్యూలో నిలబడి ఓటు వేశారు. అనంతరం అక్కడి ఎన్నికల సిబ్బందితో మాట్లాడి ఏర్పాట్లను ప్రశంసించారు. ప్రజలు పెద్ద సంఖ్యలో ఓటు హక్కును వినియోగించుకోవాలని పిలుపునిచ్చారు.

ఓటు వేసిన తర్వాత సీఎం హైదరాబాద్‌కు బయల్దేరి, అక్కడి నుంచి శంషాబాద్ విమానాశ్రయం ద్వారా దిల్లీకి పయనమయ్యారు. అధికారిక కార్యక్రమాల నేపథ్యంలో ఆయన దిల్లీ పర్యటనకు వెళ్లనున్నారు.

ఇక డిప్యూటీ సీఎం భట్టి విక్రమార్క మధిర మున్సిపాలిటీ పరిధిలోని 9వ వార్డు పోలింగ్ కేంద్రంలో ఓటు హక్కు వినియోగించారు. ప్రజాస్వామ్యంలో ఓటు హక్కు అత్యంత ముఖ్యమని ఆయన పేర్కొన్నారు. మంచిర్యాల హైటెక్ సిటీలోని 227వ పోలింగ్ బూత్‌లో మంత్రి వివేక్ కూడా తన ఓటు హక్కును వినియోగించారు.

రాష్ట్రవ్యాప్తంగా మున్సిపల్ ఎన్నికల పోలింగ్ ప్రశాంత వాతావరణంలో కొనసాగుతోంది. ప్రజల్లో ఉత్సాహం కనిపిస్తోంది. మహిళలు, యువత, వృద్ధులు పెద్ద సంఖ్యలో పోలింగ్ కేంద్రాలకు తరలి వస్తున్నారు. ఎన్నికల సంఘం కట్టుదిట్టమైన భద్రతా ఏర్పాట్లు చేయడంతో పోలింగ్ ప్రక్రియ సజావుగా సాగుతోందిఈ ఎన్నికల ఫలితాలు స్థానిక పాలనలో కీలక మార్పులకు దారితీయనున్న నేపథ్యంలో రాజకీయ వర్గాల్లో ఉత్కంఠ నెలకొంది.