ఓటీటీ వేదికపై మీనా కొత్త అవతారం

ఒకప్పటి స్టార్ హీరోయిన్‌గా దక్షిణాది ప్రేక్షకుల హృదయాలను గెలుచుకున్న మీనా, ఇప్పుడు సెకండ్ ఇన్నింగ్స్‌లో కూడా అదే ఉత్సాహంతో ముందుకు సాగుతున్నారు. సినిమాలతో పాటు డిజిటల్ ప్రపంచంలోనూ తన సత్తా చాటుతున్నారు. తమిళంలో ఇప్పటికే ఓటీటీ సిరీస్ చేసిన ఆమె, ఇప్పుడు మలయాళ భాషలో సీక్రెట్ స్టోరీస్: రోస్లిన్ సిరీస్‌లో నటిస్తున్నారు. ఇది జియో హాట్‌స్టార్‌లో స్ట్రీమింగ్ కానుంది. ఇటీవల ఇచ్చిన ఇంటర్వ్యూలో ఆమె తన వ్యక్తిగత, వృత్తి జీవితంలోని ఆసక్తికర విషయాలను పంచుకున్నారు.

బిజీ షెడ్యూల్… మిస్సైన పండుగలు

“ఒకప్పుడు వరుస షూటింగ్‌లతో చాలా బిజీగా ఉండేదాన్ని. కుటుంబానికి, పండుగలకు సమయం కేటాయించలేకపోయాను. నాకు ఎంతో ఇష్టమైన దీపావళిని కూడా ఎన్నోసార్లు మిస్ అయ్యాను. అప్పుడు చాలా బాధగా అనిపించేది,” అని మీనా గుర్తు చేసుకున్నారు.

అయితే, ఆ సమయంలో ఆమె తల్లి చెప్పిన మాటలు ఆమె ఆలోచనా విధానాన్ని మార్చాయని తెలిపారు.
“పండుగలు అందరూ చేసుకుంటారు. కానీ కొత్త దర్శకులు, కొత్త కళాకారులతో పని చేసే అవకాశాలు కొద్దిమందికే వస్తాయి. ఆ అవకాశాలను వదులుకోవద్దు,” అని అమ్మ చెప్పిన మాటలు తనకు బలాన్నిచ్చాయని అన్నారు.

భావోద్వేగాలకు దగ్గరైన పాత్ర

‘సీక్రెట్ స్టోరీస్: రోస్లిన్’ సిరీస్‌లో ఆమె తల్లి పాత్ర పోషిస్తున్నారు. “ఈ పాత్ర నాకు చాలా దగ్గరైంది. ప్రతి సన్నివేశం నా మనసుకు తాకింది,” అని చెప్పారు.

తరం మార్పు గురించి

“మనం పెరిగిన తరం, ఇప్పుడు పెరుగుతున్న తరానికి చాలా తేడా ఉంది. ఇప్పటి పిల్లలకు అవగాహన ఎక్కువ. వారికి ఏది సరైనది, ఏది తప్పు అనేది తెలుసు. మన బాధ్యత వారికి మార్గనిర్దేశం చేయడమే,” అని మీనా అభిప్రాయపడ్డారు.

సెకండ్ ఇన్నింగ్స్‌లో సత్తా

సినిమాల్లో దృశ్యం సిరీస్ వంటి చిత్రాలతో మంచి గుర్తింపు తెచ్చుకున్న మీనా, ఇప్పుడు ఓటీటీ ప్లాట్‌ఫారమ్‌లలో కూడా కొత్త అధ్యాయం ప్రారంభించారు. తల్లి పాత్రల ద్వారా మరింత పరిపక్వమైన నటనను చూపిస్తున్నారు.