ట్రంప్‌ వీసా నిబంధనలకు కోర్టులో ఎదురుదెబ్బ.. విదేశీ విద్యార్థులకు ఊరట

అమెరికా అధ్యక్షుడు డొనాల్డ్‌ ట్రంప్‌ ప్రభుత్వం ప్రతిపాదించిన కొత్త వీసా నిబంధనలకు న్యాయస్థానంలో ఎదురుదెబ్బ తగిలింది. విదేశీ విద్యార్థులు, ఎక్స్ఛేంజ్‌ విజిటర్లు, జర్నలిస్టులు అమెరికాలో ఉండే కాలవ్యవధిపై పరిమితులు విధించేలా రూపొందించిన నిబంధనల అమలును బోస్టన్‌లోని డిస్ట్రిక్ట్‌ కోర్టు తాత్కాలికంగా నిలిపివేసింది. కొత్త నిబంధనలు అమల్లోకి రావడానికి ఒక్కరోజు ముందు ఈ నిర్ణయం వెలువడటం గమనార్హం.

హోమ్‌ల్యాండ్‌ సెక్యూరిటీ విభాగం ప్రతిపాదించిన మార్పులు అమెరికాలో దశాబ్దాలుగా అమలులో ఉన్న వీసా విధానాన్ని గణనీయంగా మార్చేవిగా ఉన్నాయని కోర్టు అభిప్రాయపడింది. ఆ మార్పులకు ప్రభుత్వం చూపిన కారణాలు పూర్తిగా సమర్థించేవిగా లేవని పేర్కొంది. ముఖ్యంగా, యాభై ఏళ్లకుపైగా అమలులో ఉన్న వ్యవస్థను ఒక్కసారిగా మార్చడం వల్ల ఎదురయ్యే ప్రభావాలను ప్రభుత్వం తగినంతగా పరిగణనలోకి తీసుకోలేదని కోర్టు వ్యాఖ్యానించింది.

ప్రతిపాదిత నిబంధనల ప్రకారం ఎఫ్‌1 వీసాలపై అమెరికాకు వెళ్లే విదేశీ విద్యార్థుల ‘డ్యురేషన్‌ ఆఫ్‌ స్టేటస్‌’ విధానాన్ని తొలగించి, వారి నివాసాన్ని గరిష్ఠంగా నాలుగేళ్లకు పరిమితం చేయాలని భావించారు. అలాగే జే1 వీసాలపై వచ్చే ఎక్స్ఛేంజ్‌ విజిటర్లు, ఐ-వీసాలపై అమెరికాకు వెళ్లే మీడియా ప్రతినిధులకు కూడా నిర్దిష్ట కాలపరిమితులు విధించే ప్రతిపాదన చేశారు.

ఈ నిబంధనలు అమల్లోకి వస్తే విద్యార్థులు తమ కోర్సులు, పరిశోధనలు లేదా ఇతర విద్యా కార్యక్రమాల కోసం అమెరికాలో కొనసాగేందుకు అదనపు అనుమతులు తీసుకోవాల్సిన పరిస్థితి ఏర్పడేది. దీంతో అమెరికా విశ్వవిద్యాలయాల్లో అంతర్జాతీయ విద్యార్థుల ప్రవేశాలు తగ్గే అవకాశం ఉందని కోర్టు ఆందోళన వ్యక్తం చేసింది. దీని ప్రభావం ఉన్నత విద్యారంగంతో పాటు అమెరికా ఆర్థిక వ్యవస్థపైనా పడే అవకాశం ఉందని పేర్కొంది.

ముఖ్యంగా అమెరికాలో ఉన్న భారతీయ విద్యార్థులపై ఈ ప్రతిపాదిత మార్పుల ప్రభావం గణనీయంగా ఉండేది. 3 లక్షల మందికిపైగా భారతీయులపై ప్రభావం పడే అవకాశం ఉందని అంచనాలు ఉండగా, కోర్టు తాజా నిర్ణయంతో వారికి తాత్కాలికంగా ఊరట లభించింది. అయితే ఇది తుది తీర్పు కాదు. వీసా నిబంధనలపై న్యాయపోరాటం కొనసాగనున్న నేపథ్యంలో తదుపరి నిర్ణయాలు కీలకం కానున్నాయి.