మెగా ఇంటి కోడలిపై ఆన్‌లైన్ వేధింపులు.. సైబర్‌క్రైమ్‌లో కేసు నమోదు!!

సామాజిక మాధ్యమాల్లో జరుగుతున్న ఆన్‌లైన్ వేధింపులపై నటి లావణ్య త్రిపాఠి కొణిదెల హైదరాబాద్ సైబర్ క్రైమ్ పోలీసులను ఆశ్రయించారు. తనను మరియు తన కుటుంబ సభ్యులను లక్ష్యంగా చేసుకుని అవమానకర పోస్టులు, అసభ్య కామెంట్లు చేస్తున్న వ్యక్తులపై చట్టపరమైన చర్యలు తీసుకోవాలని ఆమె ఫిర్యాదు చేశారు.

పోలీసులు లావణ్య ఫిర్యాదు ఆధారంగా ఐటీ చట్టం సెక్షన్ 67తో పాటు భారత న్యాయ సంహిత (BNS) సెక్షన్లు 78, 79 కింద కేసు నమోదు చేసి దర్యాప్తు ప్రారంభించారు.

పోలీసుల వివరాల ప్రకారం… ‘పర్పుల్ క్రెయాన్ 00’ అనే ఇన్‌స్టాగ్రామ్ ఖాతా ద్వారా లావణ్య త్రిపాఠి మరియు ఆమె కుటుంబ సభ్యులను లక్ష్యంగా చేసుకుని పలు పోస్టులు, కామెంట్ల రూపంలో దూషణలు చేస్తున్నట్లు ఫిర్యాదులో పేర్కొన్నారు. గత కొంతకాలంగా ఈ వేధింపులు కొనసాగుతున్నాయని, ముఖ్యంగా తన వ్యక్తిగత జీవితం, గౌరవాన్ని దెబ్బతీయాలనే ఉద్దేశంతో తప్పుడు ఆరోపణలు చేస్తూ అవమానిస్తున్నారని ఆమె తెలిపారు.

కొన్ని పోస్టుల కింద అసభ్య పదజాలంతో కామెంట్లు చేయడమే కాకుండా తన వ్యక్తిత్వం, నైతిక విలువలను ప్రశ్నించేలా ప్రచారం చేస్తున్నారని లావణ్య ఆరోపించారు. ఈ నేపథ్యంలో ఆ ఇన్‌స్టాగ్రామ్ ఖాతాను నడుపుతున్న వ్యక్తిని గుర్తించి కఠిన చర్యలు తీసుకోవాలని, అలాగే ఆ ఖాతా ద్వారా ప్రచురించిన అవమానకర పోస్టులను తొలగించేలా చర్యలు తీసుకోవాలని పోలీసులను కోరారు.

ఈ ఫిర్యాదుపై స్పందించిన సైబర్ క్రైమ్ పోలీసులు కేసు నమోదు చేసి దర్యాప్తు ప్రారంభించారు. సోషల్ మీడియా వేదికగా వేధింపులకు పాల్పడిన వారిని గుర్తించి చట్టపరమైన చర్యలు తీసుకుంటామని అధికారులు తెలిపారు.