అబ్రహం లింకన్‌పై దాడి చేశామని ఇరాన్ సంచలన ప్రకటన

ఇరాన్‌ ప్రకటించిన ఈ దాడి వార్తతో అంతర్జాతీయ వేదికలపై చర్చలు మరింత వేగం పుంజుకున్నాయి. గల్ఫ్‌ ప్రాంతంలో ఇప్పటికే ఉద్రిక్త పరిస్థితులు నెలకొని ఉండగా ఈ ప్రకటన పరిస్థితులను మరింత ఉద్రిక్తంగా మార్చింది. అయితే అమెరికా మాత్రం తమ యుద్ధనౌకలు పూర్తి భద్రతలోనే ఉన్నాయని స్పష్టం చేస్తోంది.

సైనిక నిపుణుల అభిప్రాయం ప్రకారం అమెరికా విమాన వాహక నౌకలు అత్యంత ఆధునిక రక్షణ వ్యవస్థలతో పనిచేస్తుంటాయి. వాటిని లక్ష్యంగా చేసుకుని క్షిపణులు ప్రయోగించినా వాటిని మధ్యలోనే అడ్డుకునే యాంటీ మిసైల్‌ వ్యవస్థలు అందులో అమర్చబడి ఉంటాయి. అందువల్ల అలాంటి నౌకను నేరుగా క్షిపణులతో ధ్వంసం చేయడం చాలా కష్టమని నిపుణులు చెబుతున్నారు.

అబ్రహం లింకన్‌ వంటి విమాన వాహక నౌకలు యుద్ధ సమయంలో సముద్రంలో నిరంతరం కదులుతూ ఉంటాయి. గంటకు సుమారు 50 నుంచి 60 కిలోమీటర్ల వేగంతో ప్రయాణిస్తూ వ్యూహాత్మకంగా స్థానాలు మార్చుకుంటాయి. దీంతో వాటి ఖచ్చితమైన స్థానాన్ని గుర్తించడం కూడా శత్రు దేశాలకు సులభం కాదు. ఉపగ్రహాల సహాయం లేకుండా అలాంటి భారీ నౌకల కదలికలను ట్రాక్‌ చేయడం చాలా కష్టమని రక్షణ నిపుణులు చెబుతున్నారు.

ఇక యూఎస్‌ఎస్‌ అబ్రహం లింకన్‌పై ఉన్న యుద్ధ విమానాలు కూడా కీలక పాత్ర పోషిస్తాయి. ఎఫ్‌/ఏ-18 సూపర్‌ హార్నెట్‌, ఎఫ్‌-35సి స్టెల్త్‌ ఫైటర్‌ జెట్లు, హెలికాప్టర్లు, డ్రోన్లు వంటి శక్తివంతమైన వాయుసేన సామగ్రి నౌకపై సిద్ధంగా ఉంటాయి. ఇవి అవసరమైతే వెంటనే శత్రు లక్ష్యాలపై దాడులు చేయడమే కాకుండా నౌకకు రక్షణగా కూడా వ్యవహరిస్తాయి.

ప్రస్తుతం ఇరాన్‌–అమెరికా మధ్య ఉద్రిక్తతలు కొనసాగుతున్న నేపథ్యంలో గల్ఫ్‌, అరేబియా సముద్ర ప్రాంతాల్లో యుద్ధ నౌకల కదలికలు పెరిగాయి. ప్రపంచ దేశాలు ఈ పరిణామాలను జాగ్రత్తగా గమనిస్తున్నాయి. పరిస్థితులు మరింత ఉద్రిక్తంగా మారకుండా ఉండేందుకు దౌత్యపరమైన ప్రయత్నాలు కూడా కొనసాగుతున్నట్లు అంతర్జాతీయ వర్గాలు చెబుతున్నాయి.