పెట్రోల్, డీజిల్ ధరల పెంపుపై ఆందోళనలు

ఇరాన్‌పై అమెరికా–ఇజ్రాయెల్ ఉద్రిక్తతల నేపథ్యంలో అంతర్జాతీయ ముడి చమురు ధరలు భారీగా పెరిగాయి. బ్యారెల్‌ ధర ఇటీవల 95 డాలర్ల సమీపానికి చేరగా, కొన్ని సందర్భాల్లో 100 డాలర్లను కూడా దాటినట్లు మార్కెట్ వర్గాలు చెబుతున్నాయి.మన దేశ చమురు అవసరాల్లో 85 శాతానికి పైగా దిగుమతులపై ఆధారపడటంతో ఈ ధరల పెరుగుదల ప్రభావం భారత ఆర్థిక వ్యవస్థపై స్పష్టంగా కనిపిస్తోంది. దిగుమతి బిల్లు పెరగడం వృద్ధిపై ఒత్తిడిని కలిగించే అవకాశం ఉందని ఆర్థిక నిపుణులు అభిప్రాయపడుతున్నారు.అయితే, అంతర్జాతీయ ధరలు పెరిగినా ఇప్పటివరకు పెట్రోల్, డీజిల్ రిటైల్ ధరలను కేంద్ర ప్రభుత్వం పెంచలేదు. దీంతో ప్రభుత్వ రంగ చమురు సంస్థలపై ఆర్థిక ఒత్తిడి పెరుగుతోందని సమాచారం. ఎన్నికల అనంతరం ఇంధన ధరల పెంపు ఉండవచ్చనే అంచనాలు కూడా వినిపిస్తున్నాయి.

ప్రస్తుత పరిస్థితుల్లో కొన్ని ప్రాంతాల్లో డీజిల్ సరఫరాపై పరిమితులు ఉన్నట్లు ట్రాన్స్‌పోర్ట్ సంఘాలు చెబుతున్నాయి. దీంతో సరకు రవాణాలో ఆలస్యం జరుగుతోందని ట్రక్కు యజమానులు ఆందోళన వ్యక్తం చేస్తున్నారు.

దేశంలో రోడ్డు రవాణాపై ఆధారపడే సరుకు రవాణా సుమారు 70 శాతం ఉండటంతో డీజిల్ ధరల పెరుగుదల ఆర్థిక వ్యవస్థపై గణనీయమైన ప్రభావం చూపే అవకాశం ఉంది.మార్కెట్ అంచనాల ప్రకారం ముడి చమురు ధరలు 95 డాలర్ల స్థాయిలో కొనసాగితే, పెట్రోల్–డీజిల్ ధరలు లీటరుకు రూ.8–15 వరకు పెరగవచ్చని నిపుణులు భావిస్తున్నారు. ఇదే పరిస్థితి కొనసాగితే ద్రవ్యోల్బణంపై కూడా ఒత్తిడి పెరిగే అవకాశం ఉందని విశ్లేషకులు హెచ్చరిస్తున్నారు.