చిన్నారి జ్ఞానేశ్వరి అదృశ్యం కేసులో కీలక మలుపు

కాకినాడ జిల్లా తుని మండలం దొండవాక పంచాయతీ సీహెచ్‌ అగ్రహారానికి చెందిన రెండేళ్ల చిన్నారి జ్ఞానేశ్వరి అదృశ్యం కేసులో కీలక పరిణామం చోటుచేసుకుంది. చిన్నారి అదృశ్యమైన రోజు నుంచి కనిపించకుండా పోయిన కుటుంబ పెంపుడు కుక్క తాజాగా తిరిగి ప్రత్యక్షమవడంతో దర్యాప్తులో కొత్త ఆశలు చిగురించాయి.

గత శనివారం చిన్నారి జ్ఞానేశ్వరి కనిపించకుండా పోయిన సమయంలో ఆ కుటుంబానికి చెందిన పెంపుడు శునకం కూడా అదృశ్యమైంది. అయితే మంగళవారం మధ్యాహ్నం అది తిరిగి తోట ప్రాంతంలోని మకాం వద్దకు చేరుకుంది. అక్కడ పెద్ద సంఖ్యలో పోలీసులు, కుటుంబ సభ్యులు ఉండటాన్ని గమనించి ఆందోళనకు గురైన కుక్క వెంటనే అక్కడి నుంచి వెళ్లిపోయింది.

ఈ శునకం చిన్నారి ఆచూకీకి కీలక ఆధారంగా మారవచ్చని భావించిన పోలీసులు దానిని పట్టుకునేందుకు ప్రత్యేక చర్యలు చేపట్టారు. చివరకు ఉత్తర్‌ప్రదేశ్‌కు చెందిన కొందరు యువకులు చాకచక్యంగా కుక్కను పట్టుకుని అధికారులకు అప్పగించారు.

ప్రస్తుతం కుక్క అసాధారణంగా ప్రవర్తిస్తుండటంతో దాని ఆరోగ్య పరిస్థితిని మెరుగుపరిచిన తర్వాత జీపీఎస్ పరికరం అమర్చి తిరిగి బయటకు వదిలే యోచనలో పోలీసులు ఉన్నారు. కుక్క వెళ్లే మార్గాలను పరిశీలించడం ద్వారా చిన్నారి కొండలు, తోటలు లేదా ఇతర ప్రాంతాల్లో ఎక్కడైనా ఉన్నట్లయితే ఆచూకీ లభించే అవకాశం ఉందని అధికారులు భావిస్తున్నారు.

మరోవైపు చిన్నారి అదృశ్యంపై కిడ్నాప్ కోణంలోనూ దర్యాప్తు కొనసాగుతోంది. ప్రత్యేక బృందాలు అన్ని కోణాల్లో విచారణ చేపట్టి ప్రతి ఆధారాన్ని పరిశీలిస్తున్నాయి. ఈ కేసు రాష్ట్రవ్యాప్తంగా సంచలనం రేపడంతో సీఎం కార్యాలయం కూడా ఎప్పటికప్పుడు పరిస్థితిని సమీక్షిస్తూ అధికారుల నుంచి వివరాలు తెలుసుకుంటోంది.

చిన్నారి జ్ఞానేశ్వరి క్షేమంగా తిరిగి కుటుంబ సభ్యుల వద్దకు చేరాలని స్థానికులు, ప్రజాప్రతినిధులు, అధికారులు ఆకాంక్షిస్తున్నారు.