హర్మూజ్ జలసంధిలో కొనసాగుతున్న గందరగోళ పరిస్థితులు

అమెరికా–ఇరాన్ యుద్ధానికి తాత్కాలికంగా తెరపడినప్పటికీ హర్మూజ్ జలసంధి చుట్టూ నెలకొన్న అనిశ్చితి ఇంకా కొనసాగుతోంది. లెబనాన్‌పై ఇజ్రాయెల్ దాడులకు ప్రతిస్పందనగా ఈ జలసంధిని మళ్లీ మూసేశామని ఇరాన్ ప్రకటించగా, అది తెరిచే ఉందని అమెరికా వాదిస్తోంది. హర్మూజ్‌పై పూర్తి నియంత్రణ తమదేనని టెహ్రాన్ స్పష్టం చేస్తుండగా, అక్కడ టోల్ వసూలు చేస్తామని వాషింగ్టన్ హెచ్చరికలు జారీ చేస్తోంది.

ప్రస్తుత పరిస్థితుల్లో హర్మూజ్ పూర్తిగా మూతపడలేదు. ప్రధాన మార్గంలో కొన్ని రకాల ఆటంకాలు ఉన్నప్పటికీ, జలసంధిలోని ప్రత్యామ్నాయ మార్గాల ద్వారా రోజూ పదుల సంఖ్యలో నౌకలు ప్రయాణిస్తున్నాయి. అయితే యుద్ధానికి ముందు ఉన్నంత స్థాయిలో వాణిజ్య రవాణా మాత్రం కొనసాగడం లేదు.

ఇరాన్, ఒమన్ మధ్య ఉన్న హర్మూజ్ జలసంధి ఏ దేశ సొంతం కాదు. గతంలో ఇది అంతర్జాతీయ రవాణాకు స్వేచ్ఛగా ఉపయోగించబడేది. కానీ యుద్ధ పరిస్థితుల సమయంలో ఇరాన్ రవాణాను నియంత్రించి, కొన్ని నౌకల నుంచి టోల్ కూడా వసూలు చేసినట్లు తెలుస్తోంది. ఇటీవల అమెరికాతో కుదిరిన తాత్కాలిక అవగాహన ఒప్పందం కారణంగా ప్రస్తుతం జలసంధి ఇరాన్ నియంత్రణలోనే ఉన్నప్పటికీ, 60 రోజుల చర్చల కాలంలో టోల్ వసూలు చేయకూడదని అంగీకరించింది.

అదే సమయంలో హర్మూజ్ నిర్వహణ భవిష్యత్ రూపురేఖలపై ఇరాన్, ఒమన్‌తో పాటు మరో ఆరు గల్ఫ్ దేశాలతో చర్చలు జరుపుతోంది. మరోవైపు పర్షియన్ గల్ఫ్ జలసంధి ప్రాధికార సంస్థ పేరుతో ఇరాన్ కొత్త ప్రభుత్వ సంస్థను ఏర్పాటు చేసి, నౌకల రిజిస్ట్రేషన్‌ను తప్పనిసరి చేస్తోంది. ఇది భవిష్యత్తులో టోల్ వసూలు దిశగా తీసుకునే చర్యగా విశ్లేషకులు భావిస్తున్నారు.

టోల్ వసూలు విషయంలో అమెరికా కూడా తన పాత్ర ఉంటుందని సంకేతాలు ఇచ్చినప్పటికీ, ఆ ప్రక్రియను ఎలా అమలు చేస్తారనే స్పష్టత ఇంకా లేదు. అయితే హర్మూజ్ జలసంధిలో ఏ దేశం టోల్ విధించినా, అది అంతర్జాతీయ సముద్ర వాణిజ్య నిబంధనలకు విరుద్ధమని నిపుణులు హెచ్చరిస్తున్నారు.