నైతిక దుష్ప్రవర్తన కేసుల్లో గ్రీన్‌కార్డ్ హోల్డర్ల బహిష్కరణకు అమెరికా సుప్రీంకోర్టు సమర్థన

డిపోర్టేషన్ (దేశ బహిష్కరణ) కేసుల్లో అమెరికా సుప్రీంకోర్టు ట్రంప్ ప్రభుత్వానికి అనుకూలంగా కీలక తీర్పు వెలువరించింది. నైతిక దుష్ప్రవర్తనకు పాల్పడిన శాశ్వత నివాసితులు, గ్రీన్‌కార్డ్ హోల్డర్లను దేశం నుంచి బహిష్కరించే అధికారాలు ప్రభుత్వానికి ఉన్నాయని కోర్టు సమర్థించింది. అయితే, అలాంటి కేసుల్లో సంబంధిత నేరం జరిగి ఉండొచ్చని నమ్మడానికి బలమైన ఆధారాలు ఉన్నాయని అధికారులు నిర్ధారించాల్సి ఉంటుందని స్పష్టం చేసింది.

నేరారోపణలు ఎదుర్కొంటున్న శాశ్వత నివాసితులు, గ్రీన్‌కార్డ్ హోల్డర్లకు ప్రవేశ పాయింట్ల వద్దే అమెరికాలో ప్రవేశం నిరాకరించే అధికారాన్ని కూడా ఈ తీర్పు బలోపేతం చేసింది. దీంతో బోర్డర్ ఏజెంట్ల అధికారాలకు మరింత బలం చేకూరినట్లు అవుతోంది.

ఒక నకిలీ ట్రేడ్‌మార్క్ కేసులో గ్రీన్‌కార్డ్ హోల్డర్ అయిన చైనా జాతీయుడు మక్ చోయ్‌పై అభియోగాలు నమోదయ్యాయి. 2012లో అతడు చైనా నుంచి అమెరికాకు తిరిగి రాగా, ప్రవేశం నిరాకరించబడింది. అనంతరం కఠిన షరతులతో అనుమతి ఇచ్చినా, తర్వాత తాను చేసిన తప్పును అంగీకరించాడు. దీంతో అతడిని దేశం నుంచి బహిష్కరించే ఆదేశాలు జారీ అయ్యాయి. అయితే తన చర్యలు “నైతిక దుష్ప్రవర్తన” కిందకు రావని అతడు న్యాయస్థానాన్ని ఆశ్రయించగా, యూఎస్ సుప్రీంకోర్టులో అతడికి ఎదురుదెబ్బ తగిలింది.

ఇదే సమయంలో, ఇరాన్ యుద్ధం అంశంపై ట్రంప్‌కు అమెరికా సెనెట్‌లో ఎదురుదెబ్బ తగిలింది. పశ్చిమాసియాలో మోహరించిన అమెరికా బలగాలను వెనక్కి తీసుకురావాలని, సైనిక చర్యలను నిలిపివేయాలని కోరే తీర్మానానికి సెనెట్ ఆమోదం తెలిపింది. ఈ తీర్మానం 50-48 ఓట్ల తేడాతో ఆమోదం పొందింది.