అయోధ్య విరాళాల దుర్వినియోగం కేసులో సంచలన విషయాలు వెలుగులోకి

అయోధ్య రామమందిర విరాళాల దుర్వినియోగం కేసులో విస్మయపరిచే వివరాలు వెలుగులోకి వస్తున్నాయి. భక్తులు రాముడికి సమర్పించిన విరాళాలను అక్రమంగా దోచుకునేందుకు నిందితులు పలు మార్గాలను అనుసరించినట్లు ప్రత్యేక దర్యాప్తు బృందం (సిట్‌) విచారణలో వెల్లడైంది.

ఆలయంలో అనేక సార్లు దొంగతనాలు జరిగినట్లు దర్యాప్తులో తేలింది. రహస్య కెమెరాల ద్వారా సేకరించిన వారం రోజుల ఫుటేజీని పరిశీలించగా, సిబ్బందిలో కొందరు సీసీటీవీ కెమెరాలకు అడ్డుగా నిలబడటం, ఇతరులు నగదును దుస్తుల్లో దాచుకొని బయటకు తరలించడం వంటి ఘటనలు వెలుగులోకి వచ్చాయి. దొంగిలించిన నగదును ఆలయ ప్రాంగణంలోని స్నానాల గదుల్లో దాచిపెట్టి, అనుకూల సమయాల్లో బయటకు తీసుకెళ్లినట్లు గుర్తించారు.

అదే విధంగా, నగదును బ్యాంకులకు తరలించే సమయంలో కూడా డబ్బు కట్టల నుంచి కొన్ని నోట్లను పక్కదారి పట్టించినట్లు విచారణలో వెల్లడైంది. 2025 ఏప్రిల్ 27 నుంచి జూన్ 5 మధ్య దాదాపు 40 రోజుల్లో సుమారు 70 దొంగతనాలు జరిగినట్లు సిట్‌ తెలిపింది.

ఈ కేసులో ఇప్పటివరకు రూ.79.85 లక్షలు స్వాధీనం చేసుకున్నట్లు అధికారులు వెల్లడించారు. దర్యాప్తులో పలువురు బ్యాంకు అధికారులు, ప్రభుత్వ ఉద్యోగుల పేర్లు కూడా బయటపడ్డాయి. భక్తులు విరాళాలుగా సమర్పించిన ఆభరణాలు కూడా దొంగిలించబడ్డాయని, వీటిలో బాల రాముడి విగ్రహానికి సమర్పించిన చెవిపోగులు, ముక్కుపుడకలు, గాజులు, కాలి గజ్జెలు ఉన్నట్లు సమాచారం.

ఈ కేసులో కీలక పరిణామంగా శ్రీరామ జన్మభూమి తీర్థ క్షేత్ర ట్రస్టు ప్రధాన కార్యదర్శి చంపత్ రాయ్ తన పదవికి రాజీనామా చేశారు. తన మాజీ డ్రైవర్ రామ్‌శంకర్ యాదవ్ అరెస్టుకు నైతిక బాధ్యత వహిస్తూ ఈ నిర్ణయం తీసుకున్నట్లు ఆయన తెలిపారు. అలాగే ట్రస్టు సభ్యుడు అనిల్ మిశ్ర కూడా తన బాధ్యతల నుంచి వైదొలిగారు.

ఇప్పటికే ఈ కేసులో ఎనిమిది మంది అరెస్టయ్యారు. వీరిలో చంపత్ రాయ్ డ్రైవర్‌తో పాటు నగదు లెక్కింపు విభాగాధిపతి, ఒక విశ్రాంత బ్యాంకు అధికారి ఉన్నారు. స్థానిక కోర్టు నిందితులకు మూడు రోజుల జ్యుడీషియల్ కస్టడీ విధించినట్లు అధికారులు తెలిపారు.